亞洲房車賽第11及12回合賽事，已於剛過去嘅星期日（10月20日），假中國珠海國際賽車場舉行，當日戰況十分激烈，各車手都以最佳狀態作賽，加上亞洲房車賽嘅賽事已接近尾聲，而參賽嘅福特及標緻車款，都會參加嚟緊嘅澳門格蘭披治大賽，故此亦出現咗一場雙強之爭。響第11回合賽事中，駕駛標緻306嘅芬蘭車手韋高侖，與長人車隊隊友兼上屆總冠軍拿達活鬥得難分難解，直至第4圈韋高侖憑住出色嘅技術，以輕鬆嘅姿態一直領先過終點，而拿達活則響第5圈因戰車嘅傳動軸損毀而退出。
及後響第12回合，韋高侖再一次勝出，雖然呢場勝仗未足以讓其登上亞洲房車賽總冠軍寶座，而香港車手盧家駿亦在努力追趕，喺賽事中獲得第2名嘅成績，故此兩位車手會再響嚟緊11月喺澳門舉行嘅最後兩回合賽事中，為爭奪總冠軍而戰。相信屆時又會掀起另一場非常精采嘅賽事，各位車迷記住留意喇。