攞黃牌都要有價值先好攞？無錯，曼聯「神經刀」門神巴夫斯就喺上周六作客富咸就做咗示範例子，幫球隊救咗個十二碼，唔使輸波，最難得係費格遜賽後重話佢係一位專業足球員！
如果各位球迷有睇直播，相信都知道巴夫斯喺馬白蘭基主射十二碼前，專登企喺門柱度而唔企喺白界線上面，搞到球證要出示黃牌警告佢，但係曼聯如果唔係靠佢，好大機會輸波。巴夫斯「出蠱惑」賽後就惹起富咸助教達米安奴唔多高興，重話「神經刀」此舉非君子所為。
另一邊廂，老費當然要撐巴夫斯，解釋話專業足球員難免會做出此類捉心理行徑，但係又唔會對球證出示黃牌決定提出上訴喎！我求大俠都覺得守門員撲十二碼同對手大玩心理戰無可厚非，完全無問題，咁樣攞黃牌，總好過「插水」博十二碼喇！
前晚國米對祖記場波好有戲劇情節，國米響補時至由韋利扳平。呢球波最過癮係真正入球功臣唔係韋利，而係國米龍門托度，因為佢助攻撞到個波彈向門前，個波最後先碰到韋利，所以托度賽後興奮到死，當正自己入咁款。鬼咩，托度響國家隊爭位成日都輸畀保方，今次真係咩仇都報晒囉。
紐卡素老將舒利亞前日對母會布力般時𡁻兩粒，第一球重係佢足球生涯第三百球㖭。老舒事業最高峯時就係效力布力般，本來喺返娘家創紀錄值得開香檳，之但係自己隊波最後輸到二比五咁大鑊，試問佢重邊有心情慶祝吖。難怪佢賽後不知幾沮喪，話寧願自己無波入而紐記凱旋，都好過𠵱家咁喎。
米字國教頭艾歷臣嘅舊愛歐麗嘉呢排好出位，佢本自傳唔單止提到艾歷臣同哥利摩亞，重大爆原來有另一個球圈男友，盛傳最大可能係熱刺前鋒費迪南。不過俾此姝形容到好似魔鬼嘅哥利摩亞好唔滿意俾人爆料，據講有可能公開佢同歐麗嘉嘅性愛影帶，證明對方有幾淫蕩。可能有嘢睇噃，我求大俠舉腳贊成！
前晚西甲班霸皇馬樣衰衰咁吞桑坦德兩蛋，爆晒大冷，搞到成地眼鏡玻璃碎不特止，啲上盤客重一殼眼淚。又難怪啲波友咁㷫，因為唔少人都覺得皇馬成場波好似踢到行行企企咁，同平時判若兩隊。有口痕友重懷疑佢哋打假波㖭；係唔係假波我求大俠就唔敢講，不過阿仙奴三十場不敗身都破喇，波壇有咩事唔可以發生？
澳洲球手曉域治以病毒感染理由退出咗馬德里大師賽，但就見佢陪住喺瑞士參賽嘅女友史施達絲，點知呢位澳洲球星眼見美國老將阿加斯愈戰愈勇，已威脅到佢嘅世界第一排名，立即接受「外卡」參加下個禮拜嘅瑞典賽事，所以我求大俠成日都話，要保持高峯永遠比登上高峯更難，曉域治都應該要犧牲吓拍拖時間囉！