黃琛如名字的確有點陌生，但一講星爺欽點嘅啤妹Eva，相信好多人都會話：「原來係佢！」。唔好以為Eva靠樣、靠激凸身材、靠騷味出位而成為男士心中嘅女神，其實Eva出得廳堂，重入得廚房。今次就為大家露兩手，煮佢嘅冧仔招牌菜啤酒蝦，藉機顯露她鮮為人知的內在美。
記者：區佩嫦 攝影：林栢鈞 示範：黃琛如
Eva通常會去油麻地街市同新填地街嘅露天街市買餸，因為呢個街市差不多由佐敦去到油麻地廟街，範圍大貨色齊。雖然Eva同檔口老闆唔算熟絡，但好多老闆見佢咁靚女，都對佢特別客氣，始終靚女都係着數啲。
以啤酒廣告成為一代啤妹嘅Eva，她的撚手小菜居然係啤酒蝦，的確無負啤妹之名。這味蝦其實是Eva在美國讀書時的冧仔菜式，「我男朋友好鍾意食蝦，於是一放假，我就會煮蝦的菜式𠱁佢開心，當中佢最鍾意呢味啤酒蝦，佢話既有蝦的鮮甜，又有酒的醇味。雖然呢段情無結果，但煮得多就變成自己嘅招牌菜。」
其實啤酒蝦是由黃媽媽傳授的，由紹酒蝦演變而成，「酒只不過係吊出蝦的鮮味，用乜嘢酒都得。當時喺外國買啤酒方便，所以就選用啤酒，不過蝦就一定要新鮮，蝦唔新鮮一定唔好食。」
小記一心以為啤酒蝦會無乜酒味，殊不知食落口，除了蝦夠鮮甜外，重有少少帶甘嘅啤酒醇味，小記和攝記食完一隻又一隻，唔使十分鐘，竟然食晒成碟。
海蝦 1斤
啤酒 2罐
原來食蝦都有小貼士，喺剝蝦殼時，記住要將位於近蝦頭部位嘅沙囊剝走。Eva話：「呢個沙囊係啲蝦平日食嘢時，將食落肚嘅沙儲喺呢個囊度，唔剝咗去就會覺得啲蝦有啲苦，無咁好味！」
12歲已在廚房跟媽咪偷師的Eva，其廚藝已有黃媽媽六、七成的功力，這個滋潤清熱的花旗參雞湯，當然亦是黃媽媽的首本名菜之一。這個雞湯最特別的材料係金華火腿，「金華火腿夠晒香，比用鹽更能吊出湯的鮮甜，平日我煲湯都會加少少金華火腿，貪佢味道鮮甜。」
小記一向唔鍾意花旗參的甘苦味道，不過無可否認，用金華火腿煲出來的湯，再配合竹絲雞，啖湯的確幾鮮甜可口。
竹絲雞 1隻
花旗參片 2両
杞子 1両
金華火腿 半嚿