地產多聲道:<br>中原內地員工推介港樓

地產多聲道:
中原內地員工推介港樓

蘭西噚日喺深井碧堤半島售樓處,見到一班人戴住紅帽仔,以為有表演睇,打聽之下,原來係中原中國嘅員工。
正當蘭西同行家圍住九倉助理董事黃光耀做訪問時,中原一姐劉瑛琳突然走過嚟,拉咗佢落去中記舖位。原來係介紹中原中國兩個主管認識黃光耀,成班同事重同佢大合照留念。
劉一姐話內地分行同事有成四十人,重係精英先至有機會落嚟㗎。一姐預告呢班同事會喺廣州等地,推介尖沙嘴擎天半島二期,噚日只係順便同碧堤造勢。唔通九倉準備在國內做路演推介擎天半島二期?
黃光耀連忙解畫,話九倉搵地產代理行嘅中國部幫手,向長駐內地港商推介。因過去幾年班港商搵埋唔少,但就無時間在港睇樓置業,對呢班貴客,九倉會視乎個別人客要求將成交期延長,但因滙率問題,一定唔收人民幣。
噚日碧堤吸引唔少人睇樓,發展商亦繼續有嘉年華,啲小朋友就玩得好高興。

何添家族租出愛都
由恒生銀行創辦人之一,何添家族持有嘅中半山愛都大廈高層單位,剛以七萬八租出,享海景,面積3347方呎,每呎二十三個三,屬合理水平。租客係大公司董事。
何添家族係愛都大廈大業主,持有約二十個單位。於早年大手購入,全作出租用途。現時重有三個單位招租中。
香港置業堅尼地道分行經理霍百昌說,區內豪宅租金較年初下降一成,但高質素者仍能保持一定嘅租金水平,如同區寶雲大廈高層四千方呎單位,日前以七萬蚊租出,每呎十七個半。

半山樓萬三元有交易
半山區一向係富貴之地,買得起呢度啲樓嘅,身家一定豐厚;租得起嘅,亦都有番咁上下江湖地位。不過,由於租金同樓價你追我趕,互相拖累下跌,蘭西最近睇到啲租務成交,九年樓嘅西半山干德道駿豪閣高層六百七十呎單位,你估月租幾多?只須萬三蚊,分分鐘租屋苑樓都係咁上下咋。可能遲吓,一萬蚊唔使就可以入住半山區,高貴一吓。

新地出售車位陸續有來
新地今年賣樓成績唔錯,其他物業類別都去到貨,淨係講車位,第三季夾埋賣咗236個,套現6961萬,平均每個三十萬有找。
新地透過旗下公司拆售車位,包括荔枝角美孚新邨、青衣翠怡花園同薄扶林置富花園車位。美孚新邨1169個車位賣咗176個,收5215萬。翠怡花園40個,值1153萬,置富花園20個車位套現593萬。
第三季美孚同置富嘅車位買賣登記,絕大部份都係由新地包辦,而翠怡更全部都係新地賣出嚟嘅。新地仍會繼續出售車位,有車一族可以慢慢揀。

拍賣行慳錢唔租酒店
拍賣行近一年枕住每周有幾場拍賣會,可能市場注意力去晒一手盤,所以拍賣行都要度橋搶番啲客,最新手法係買家免佣。不過,原來唔係場場拍賣會都係買家免佣。所以每次都會事先張揚,等啲客留意。
不過暫時所見,成績唔算理想,拍賣行分分鐘要蝕水。因為𠵱家要畀埋宣傳及場租等費用,賣到先至有佣收。一場拍賣,成本差唔多要四萬蚊,以個半佣計,起碼要拍到三百幾萬先至平手,重未計人工喎,若果計埋,就差唔多要賣六百萬先至夠。但係𠵱家一場拍賣,好多時只係賣到幾件貨,為咗慳錢,有啲索性唔租酒店,改喺自己公司,撥出地方舉行拍賣。真係世界難撈,慳得就慳。
蘭西
電郵地址:[email protected]