「2002MTV萊卡風尚頒獎大典」前晚在上海大劇院舉行，鍾麗緹、章子怡、陳冲、林憶蓮及梅艷芳都穿得極之性感，尤以鍾麗緹最搶鏡頭。而梅艷芳與舊男友趙文卓在慶功宴上碰頭，二人密傾一番後更大方合照。
記者胡比、陳慧安上海直擊
鍾麗緹前晚以一襲黑色大低V晚裝出席「2002MTV萊卡風尚頒獎大典」，林憶蓮則穿大露背裙，而章子怡及梅艷芳亦分別穿透視魚網衫及tubetop開窿上衣，眾女星鬥騷身材，務求成為全場焦點。
梅艷芳與舊男友趙文卓分手多年，二人前晚在台上未有碰頭，但在慶功宴上，當阿梅與人寒暄時，剛好趙文卓要離開會場，二人相遇即大方打招呼。阿梅與趙文卓傾完密偈後，亦應記者要求拍合照，阿梅表現較大方，而趙文卓則有點不自然。
事後阿梅接受訪問說：「我哋好耐冇見，不過佢嚟親香港都有搵我食飯，男女分開好平常，又唔係有乜大不了。」對於趙文卓表現尷尬，阿梅則說：「佢好怕醜，但其實大男人，要威嚴，不過唔會太表露。」
提到有指StarEast股價下跌，但譚詠麟、陳百祥及曾志偉則早就賺夠錢離場，阿梅說：「我從來冇分過錢，當初朋友話做我就做。」問阿梅投資了多少錢，她說：「投資個名囉，不過信我嘅朋友先信呢樣嘢，名譽好緊要，我要搞清楚啲數，唔想信我嘅人因為咁而有損失。」問阿梅會否退股？她稱：「睇番啲數先，我同成龍情況一樣，都係唔好再問我啦。」
譚詠麟亦提到StarEast情況，他說：「我哋唔係賣StarEast，陳國強傾緊同陽光衞視合作入股。」對於股票蝕錢，阿倫謂：「係長線投資，唔係睇𠵱家。」有指阿倫將辦公室布置奢華，但卻不回去開會，他解釋：「邊有？我成日走嚟走去開會，辦公室放晒E-Kids、EO2啲衫，冇位開會呀。」
風尚歌曲：杜德偉《愛你的全部》
風尚男演員：吳彥祖
風尚女演員：鍾麗緹
風尚突破創意女歌手：林憶蓮
風尚突破創意男歌手：任賢齊
風尚亞洲演員：梁朝偉
風尚亞洲女歌手：梅艷芳
風尚亞洲男歌手：任賢齊
MTV音樂成就獎：譚詠麟
萊卡風尚成就獎：李寧