我大口羅拉始終欣賞啲有才華同有內涵嘅藝人，多過嗰啲只靠個樣搵食、玩兩三年就打柴嘅偶像，好似竹中直人咁，絕對冧死我大口羅拉。大家咪睇佢喺《五個相撲的少年》同就快喺香港上映嘅《乒乓》入面做埋啲搞笑角色，或者喺《禁室培慾》裏面扮神經漢，就將佢定型，其實佢幾多才多藝㗎。
竹中直人身兼演員、導演同埋攝影師，佢喺《東京日和》扮過攝影大師荒木經惟，查實佢一得閒就會好似荒木咁搵啲靚女影吓大膽性感寫真，肯做佢model嘅，都唔係啲二打六AV女或水着妹，個個嘅知名度都有番咁上下。最近竹中直人操刀嘅Erotic性感寫真系列又再刊登喺日本雜誌，繼有女優坂井真紀任佢舞，呢次重有篠原涼子做佢嘅model。
篠原涼子照住竹中直人嘅指示，擺咗好多噴血姿勢，重有啲變態㖭，佢唔使除晒衫，就已經散發出Erotic嘅挑逗魅力，如果唔係竹中直人咁大面子，你估啲女星會唔會肯拍啲咁嘅變態相先？