近期成為城中熱賣車款嘅新版福士Polo，最近廠方又有新搞作，喺早前於巴西聖保羅舉行嘅車展上，展出咗一款全新Polo三廂式四門轎車型號，並在巴西生產及以拉丁美洲市場為主要對象。
呢款有機會被稱為PoloSedan嘅新車，車首造型依舊保留有原來Polo嘅神髓，但由於加裝尾廂嘅關係，故車長達4179mm，較現有揭背型號長多282mm，而尾燈亦改換上全新設計，從而令人望落有耳目一新之感。車廂布局亦會與現有揭背型號相近，而尾廂嘅容量更高達432公升，遇有需要更可將後排椅背放平，以增加載物容量㖭。廠方亦提供有兩台分別係1.6公升（101匹），以及2.0公升（115匹）引擎供用家選擇，以切合不同需要。至於會否喺其他地區生產或發售，廠方仍在考慮中，有興趣嘅朋友就要密切留意喇！