高寶綠色（274）上周因為派息派紅股除淨，成交量大咗好多，雖然股價唔係升得十分多，但亦算硬淨，上周五升3.3％，收1.55元，成交金額2200萬元。
經紀黃同小初講，高寶之前炒化妝品概念，下一輪將炒分拆，傳聞公司正在籌備將旗下BMS生物科技污水處理系統分拆獨立上市．
高寶現價相比公布業績時，計落跌咗唔少，內裏原因有幾種講法，首先當然係大市唔就，幕後覺得再花本錢炒上去唔值得，既然股價已經升咗唔少，不如散番多少貨，儲錢留番下一浪再砌過。另外一個講法，就係高寶之前曾經發行過一批可換股債券，呢批CB持有者沽貨，導致股價下挫。
姑勿論事件原因為何？幕後炒家應該唔會就咁收手，因為有關人等尚未散晒貨，唔排除稍後時機成熟，班友又會再次發功。不過，小初就有啲唔明白，高寶好似收購咗呢檔污水處理系統唔係太耐，點解咁快就可以搞分拆？
慕容小初