以騎呢出位、瘋狂追捧明星而突圍的蜥蜴仔，早於四、五年前已成功爭取曝光，替報章雜誌拍下不少「驚」人硬照。曾經朝十晚七追星、日踩五場兼加入二十個FanClub的蜥蜴仔，今天竟然說：「我唔要再好似儍佬咁追明星，我要帶紅啲Artist，等人哋追番我。」今年六月他正式向經理人界進軍，尋找接班人，數月來獵得十多個小Model，當中就最欣賞以扮Cookies而知名的Aunties成員八神。
記者：吳佩璇 攝影：陳智良
部份相片由《壹本便利》提供 鳴謝：Upstairs
八神（左）半年前在旺角同班Friend宣傳暴走鞋店時遇上蜥蜴仔，並主動跟他打招呼。後來蜥蜴仔構思做經理人，睇中八神扮Cookies的玩得性格而羅致旗下。八神話：「短短兩、三個月，佢真係幫我接到十幾單Job。但有時佢會吹到好大，話同Twins同台表演，結果就冇；不過，有次又真係帶我上唱片公司Casting！」
「都有少少驚搵笨，所以叫多個Friend陪我。識咗佢幾日都幫我接到份雜誌Job，當PartTime都OK啦。」
「我係上網睇到個Ad應徵嘅，到約出嚟見面都打咗個突，原來係蜥蜴仔！我知佢係邊個，佢雖然騎呢，但我接啲Job唔騎呢就得啦。佢今日先帶我去Casting雜誌封面，一試就得咗，好開心。」
原名：曾德華
年齡：24歲
騎呢歷程：
中四輟學後便當個全天候Fans、做老臨，曾拍《誤人子弟》、《生化壽屍》、《行運一條龍》等。
要不是記者親眼於某晚上，花近兩、三小時觀察蜥蜴仔街頭獵豔搵Model，也不相信蜥蜴仔原來真有一定知名度，有七、八成人都說知道他是誰，於是就萬事好商量，加埋他那獵豔４招，果然好掂！
蜥蜴仔很明白要揀哪類人埋身，大概十零歲、帶點前衞但又壞唔晒那種，落叠機會奇高。
以蜥蜴仔連月來昅女心得，銅鑼灣Sogo、世貿、東角駅為最多靚女出沒之地。
根據蜥蜴仔理論，夜蒲的女仔較為Casual熱情，故他往往會由夜晚蒲至天光搵女。
月初蜥蜴仔付了$800大元於網上刊登了十日廣告，但應徵者質素參差，所以他認為自己落街搵，親力親為，唔使錢又啱心水。
阿細（右）唔單止認得蜥蜴仔，重一早就昅到記者同蜥蜴仔喺處昅人。阿細話如果有得試做Model都無妨。左手邊的Terry則是蜥蜴仔的朋友，咁啱撞到，真係相識遍銅鑼灣！
曾經為了追明星每日走勻港九新界，每朝第一件事就是看報紙的娛樂星蹤，連不知名的候選港姐也照跟，甚至為偶像做起老臨來……如是者大大話話過了五年這種常人難以理解的生活模式，今日蜥蜴仔竟然話自己蠢咗：「一年前我開始慢慢冇追明星，都唔知追嚟為乜，好似儍仔咁。都跟咗成五年啦，悶喇！」還說已將那堆積如山的明星相全部棄掉！
早在98年，他就曾經成立過一間「蜥蜴仔創作室」，由老細、接Job人到演出者，都是他自己本人。今年六月他的起心肝，將公司易名為「蜥蜴仔娛樂事務所」，依然是低成本經營一腳踢，但就積極羅致新人，訪問當天就剛帶了三個小妹妹到某影音雜誌Casting做封面女郎，還蠻有抱負的說：「希望帶到啲新人入行，尤其𠵱家咁多雙失男女，當做善事囉。」以騎呢上位的蜥蜴仔，直言希望發掘到一個騎呢接班人：「因為騎呢人上位機會大，不過我暫時都未搵到個騎呢得過我嘅。」現時手頭那十多個Model中，只兩三人肯玩驚喜，當中蜥蜴仔就最欣賞Aunties成員八神：「我睇好八神㗎，佢好積極，乜都願意做，我畀佢七十分。」事實上，近兩三個月的《壹本便利》中，都不難發現八神的出位扮相，統統都是蜥蜴仔做中間人撮合的。
事實上，由瘋狂Fans年代開始，到後來不斷替年輕人雜誌拍硬照，蜥蜴仔已於傳媒界建立了一定人脈。對於娛樂圈幾時幾月有試鏡、甚麼片商或雜誌社搞Casting，他分分鐘比行內人更瞭如指掌，故要他推薦些新鮮面孔給報章雜誌拍照，真的難不倒他。而且這類不講究規模的經理人公司，合作形式簡單快捷，某程度也真的給他找到了一條剛容得下這隻蜥蜴的生存空間。目前他跟FreeLance模特兒二八分帳，自言平均月入有四、五千，好景時也有五位數字：「夠我食喇，況且我當興趣咁做。」
所言不假，蜥蜴仔好多時的所作所為，都好像真的純為個人喜好。問他長線目標，支支吾吾：「我冇諗住要好似鄒世龍咁賺大錢，當儲經驗囉，都會喺九龍灣廠房搵個百零呎舖仔做Office嘅。」然後說到想好似張如城咁可以唱歌：「我最鍾意係唱歌，但我冇張如城咁有錢，出唔出碟都冇所謂，我𠵱家諗緊網上播，重開始作歌㖭！」或者愛變色加百足咁多爪，才是蜥蜴本來的個性！