八方前晚去睇《新傾城之戀》，散場之後在劇院舞台參加香港話劇團25歲生日party，遇見好多文化人，例如陳冠中、陳麗卿、高瀚文，以及今次擔任主角的蘇玉華、謝君豪、劉雅麗，飲飲吓香檳，忽然有時空交錯的感覺。
一九八七年，話劇團為慶祝大會堂落成25周年，演過《傾城之戀》，導演係陳尹瑩，劇本就係由陳冠中改編，陳麗卿、高瀚文當時已有份演出，八方睇咗兩次。眨吓眼十幾年，今次到劇團自己慶祝銀禧，重排番呢齣戲嚟誌慶兼為發展基金籌款。
話劇係冷門藝術活動，但前晚好多人專誠捧場，梁愛詩同媽咪一齊，李國能夫婦重早到過八方。前一行見到梁秉中、陳祖澤、彭玉榮、陳黃穗，林旭華、李純恩、馬家輝就喺後面，黃秋生、張達明、徐詠璇身為發燒友，當然唔會錯過；CSL行政總裁伍清華重帶埋十萬蚊支票嚟捐畀話劇團，真係唔話得。
梁司長對八方話，香港有咁好嘅嘢，應該推廣多啲、做多啲，介紹畀遊客。原來梁司長好鍾意睇戲，上次都有睇《還魂香》；李國能夫婦亦係戲迷。莫非司法界對戲劇人生，特別感受得深？
傳真︰2623-9278
電郵︰