係都唔肯跌，美股上周五先挫後揚，杜指早段跌近百六點，收市倒升47點，港股今朝有機會借勢高開。
如果港股真係大幅高開，藍籌Call輪追唔過。恒指由低位反彈，一口氣升近千點，點都要唞吓，短期再升空間有限，調整係遲早嘅事，想玩藍籌Call輪，不妨耐心等吓，遲啲有機會買平好多，何必心急？
藝高人膽大者，可以吼位短炒一轉淡友輪，恒指Put輪可揀9444同9448，滙豐Put輪則要9366。不過，大市個勢似乎重係向好，造淡係逆勢而行，自問手腳慢唔貼市者，最好咪亂博，不如等恒指落番去9300至9400水平，再揀Call輪上車好過。
十六大下個月召開，唔少人都估紅色股份短期內會有作為，話唔定藍籌休息之日，就係佢哋發威之時。
照咁睇，中信泰富（267）嘅Call輪值得留意。中信份屬紫籌，紅色成份重，基本因素亦大有改善，股價升勢初起，上周五收17元，短線有機會先試18元。中信Call輪當中，以9165交投較旺，重有個零月玩，溢價0.38%，槓桿率5.2倍，可以玩番多少。
章盛