灣仔君悅酒店前晚好鬼熱鬧，鄭裕彤同劉鑾雄（大劉）呢兩位富豪，同埋好耐冇見嘅關淑怡，都齊齊喺君悅出現，馮仁昭知道九巴家族後人雷兆光太太雷林靜怡個弟弟喺君悅擺結婚酒，但原來兩位富豪只係約埋一齊食飯，而唔係去飲。
彤叔同大劉食飯食到凌晨十二點幾至走，馮仁昭問彤叔係咪嚟飲喜酒？彤叔話唔係，然後就叫司機車佢離開。
富豪一向出手闊綽，大家又估唔估到佢哋會畀幾多錢貼士？彤叔臨走之前，馮仁昭就昅到佢畀咗六十蚊貼士畀酒店職員，出手唔算闊綽。至於大劉就遲彤叔成個鐘頭至走，佢一見成班記者喺度，就即刻搭的士走人。
而關淑怡前晚就十一點去咗君悅，同朋友飲嘢飲到凌晨一點先至走人，有人問關淑怡早排有傳佢秘密生仔，但關淑怡完全當聽唔到，之後就一支箭開車走人。
早排傳過富豪同名媛嘅戀情，佢兩個的確係拍過拖，但係好快又分咗手。因為富豪本身有女朋友，二來名媛同富豪嘅性格唔係咁夾。名媛鍾意蒲，但富豪就鍾意靜靜地，所以相處得耐就發現大家格格不入，咁佢兩個都係理智嘅人，所以決定盡快斬斷情絲。
余文樂噚日同麥浚龍（Juno）喺荃灣廣場出席新城活動，Juno透露佢會喺月底組織歌迷會，有三百個會員咁多。問余文樂幾時搞歌迷會？佢就話：「我年底前會搞，台灣有四千fans，加拿大、新加坡、馬來西亞同內地都有。」當余文樂知道Juno得三百fans後，佢竟衝口而出話：「咁慘？」然後再補飛話：「我係累積咗三年先有咁多fans。」
三T嘅Yumiko、Maggie同Mandy成為英皇力捧新人之後，成日有機會出席唔同嘅活動，重會接受訪問，唔知點解英皇就硬性規定要三個女仔一齊接受訪問，就算有人要求分開做都唔得，唔知係唔係驚三小花爭出位，先安排佢哋一齊做訪問。
點知原來三個女仔都好鍾意答問題，重成日搶住答，好似噚日佢哋去沙田出席活動，三T就爭住講自己嘅減肥心得，最後成班記者就乜都聽唔到，因為同一時間太多人講嘢，都唔知聽邊個講好！
邱淑貞（豆斗）噚日同老公沈嘉偉、好友張智霖同袁詠儀返香港。早前傳過豆斗懷孕嘅消息，但就記者所見，佢身材似乎冇乜走樣，腹部冇隆起嘅迹象，記者發現佢哋嘅時候，袁詠儀同豆斗重邊行邊玩，似足大細路。而袁詠儀就笑住對豆斗話：「記者唔認得你㗎嘞！」豆斗聽完後就即刻匿喺袁詠儀後面。