早前一招免費送飯盒先聲奪人，再來割價大傾銷，結果掀起一場飯盒大戰，最後得益者，當然是一眾小市民。不過話之你日日大減價，味道唔好又唔夠飽真係睬你都傻。我們決定搵出各界代表：建築工人、學生同OL一族，齊來為飯盒仲裁，評估家陣的平價飯盒質素如何！究竟邊種飯盒屬於抵食好味又大件？即刻揭曉！
記者：陳冰麗 攝影：伍慶泉
在眾多的飯盒中，我們就揀選了四種較為抵的飯盒作為測試對象，分別有一號代表7-11的日式雞扒飯；二號代表的哈迪斯鮮菌白汁雞飯；三號代表的肯德基家鄉雞皇飯，最後代表是街市燒味油雞飯。四種飯都是以雞肉為主，口味比較接近，然後叫每個界別代表人物試吃四個不同飯盒，憑飯盒的味道、材料份量及飽肚程度去評分。
經過建築工人、學生同OL的投票後，票數以燒味飯盒大比數勝出，三個代表中只有OL的Mable不選燒味飯盒，原因是賣相不夠靚，食落較油，不符合KeepFit原則。強哥表示燒味油雞飯份量足，夠飽肚，有肉又有菜，抵食大盒，而且飯粒軟硬適中，入口有咬勁。而學生三人組則表示，雞肉味濃兼夠滑，飯粒不算太腍，夠彈牙。所以冠軍是由街市燒味飯盒勝出。
飯餸較新鮮 最受歡迎
街市燒味檔
地址：將軍澳新都城
賣相雖然平凡，但無論飯或餸都是較新鮮，最重要的是雞肉嫩滑，飯味又夠香之餘飯粒軟硬適中。在地盤訪問時多位不願上鏡的工友都選這盒油雞飯，他們都話一盒油雞飯連飯帶餸好夠份量，而且只係$10，真係抵食夾飽肚；至於代表學界三T的雯雯表示，若肚餓起來，一盒油雞飯一樣食得晒，但其餘三盒份量就比較少，至少要食一個半至夠飽，可想而知傳統的燒味飯相當受大眾歡迎。
一致表決：價錢較貴
肯德基
十一點後供應的家鄉雞皇飯，是四款中最貴的一款飯盒，比較之下大家都一致認為物非所值。首先雞的肉質不算滑，採用的是粗雞絲，飯粒比較乾身，配菜及汁亦不算多，但份量則是四盒之中第二重，雞肉份量都唔少。
賣相佳飯稍腍
７-11
日式雞扒是7-11最近新推出的飯盒之一，總括幾位試過味後，都有先被其精緻的賣相所吸引的感覺，味道方面都不俗，燒雞扒夠滑又夠大件，重有醃蘿蔔、雜菜粒配菜，好有日式風味，但美中不足是飯稍腍。計我話佢都有另一可取之處，就是半夜三更見肚餓，都可以隨時落街買個叮熱食。
食兩個先飽肚
哈迪斯
這個十一點後供應的鮮菌白汁雞飯，是其他三款雞飯中份量最少的一款，一個成年男人吃便未必夠飽，強哥話至少要吃兩個至有滿足感，相反細食的Mable鍾意它份量恰當，賣相精緻，汁多又有至愛嘅蘑菇及粟米粒在內。