「本來星期六要飛加拿大、星期日就做椎間盤移位手術，後來發覺針灸有效，就冇飛到……」甫坐下傅明憲（Gigi）便肉緊的訴說這兩天很忙，為的全是寶貝小狗！笑稱前世是狗的Gigi，注定一生狗仔債！難怪當大家姐Ocha勇奪「狗醫生狗隻成就大獎」時，她感動得聲帶哽咽：「好似望子成龍咁！」並泛起與牠無數個第一次！
記者：吳佩璇
攝影：陳穎
「聽老人家講幫細路仔起啲唔似人名嘅名，閻王本生死冊就搵唔到佢。所以除咗孟波，我幫佢哋起晒啲食物名。」Gigi果真愛狗如命！
（左至右）
10歲孟波：我係二佬，喺澳洲出世㗎。
7歲饅頭：我係孻仔，有輕度自閉，食咗心理醫生開嘅藥，漸康復！
11歲Ocha：影呢張相時，我係「獨眼龍」，但坐中間，幾咁有大家姐風範！
7歲Halibut：我係三佬，同大家姐一齊做狗醫生！
7歲西蘭花：我係四妹，喺香港出世嘅！
天生愛狗的Gigi，狼狗、唐狗、北京狗、松鼠狗……閒閒哋養過十幾隻狗。但小時候，玩狗多過湊狗。直至隻身遠赴美國讀書，買下了Ocha，才知養狗滋味。沖涼、撩耳、大小二便、打防疫針等，搞到踢晒腳！「歲幾嗰陣佢第一次嚟Period，忽然見地下有灘血，嚇到我即刻帶佢睇醫生。」從此，學懂了跟狗仔換M巾！
後來，Gigi帶小Ocha回港拍劇，沒經驗的她只在機艙狗籠內鋪了條毛巾，連一滴水也沒預備，可憐的Ocha熬了十多小時！一切一切，Gigi深感歉疚：「做大家姐無啲細佬妹咁幸福，好似實驗品咁，所以我覺得欠佢好多！」
Ocha很有人性，睡覺時四腳向天兼鼻鼾聲大作，不知就裏的人還以為Gigi搭上了一個大肥佬！習慣獨睡的她可適應這枕邊「人」？「Ocha係第一隻同我瞓嘅狗，最初都唔慣佢咁大鼻鼾聲，惟有抱佢打側瞓或者拍一拍佢。」不過，自從Ocha夠氣夠力跳上Gigi的大床後，牠就把原來屬於自己的棗紅色狗床咬個稀巴爛。果然好狗！
頑皮事浪接浪，Gigi頭一次帶寵物出門，就是與Ocha從LA到溫哥華探親。然而人和狗尚未到溫哥華，尷尬事就接踵而來：話說當時Ocha只有4個月大，航空公司容許體積小的狗隻以狗籠置於機椅下而毋須寄艙。但少不更事的Ocha難耐長途機程，一味愛吠。Gigi惟有裝睡，因為稍一張開眼或喝一口水，Ocha都會用氣憤的眼光怒睥，彷彿在控訴：「你瞓醒都唔抱我出嚟玩！」搞到Gigi全程不吃不喝扮死狗！
可惜，Ocha兩年前年因打架變成「獨眼狗」，一年後，又因打架把另一隻眼也弄盲！Gigi說時眼紅紅：「佢冇埋第二隻眼嗰日，係我媽咪生日……」當時Ocha經常撼頭埋牆、發𤷪𤺧、胃口變差、雙眼又常流血水，自卑得只會瑟縮床下底！「我成個人謝晒，成個月冇梳頭冇出街。」身邊人曾叫Gigi將Ocha人道毀滅，令她氣憤難平：「養狗係一生一世，唔係𠱁你開心咁簡單；佢都會令你唔開心，會老會死。」那時Gigi不離不棄，上廁、吃飯、上網，24小時寸步不離。「其實，我除咗買對『噹噹』拖鞋着，等佢知我喺邊之外，其他都冇分別，佢嘅嗅覺同聽覺重比以前叻咗。」
出奇地，Ocha過了只1星期就主動逗其他狗仔玩，進入康復階段。反而是Gigi久久不能釋懷：「我最初好介意人哋話Ocha冇眼，所以我會幫佢戴黑超戴Cap帽，但佢就Fing開，因為佢根本唔介意，修為比我高！」
Ocha失明後第一次落街，甫落樓梯便跣了一下，但Ocha頓頓足，就獨個兒繼續前行。「佢比我堅強，係佢教識我生命唔係咁脆弱，逆境可以求生。」憑着這打不死的樂天個性，Gigi帶Ocha應徵做狗醫生，年多以來到訪心光學校及探訪病人。Gigi語重心長：「動物殘疾係唔需要遺棄，佢哋重可回饋社會。」
其實，當初是Ocha的細佬Halibut先做狗醫生，Gigi因牠失明有所顧慮，但引薦的朋友反說：「正因佢睇唔到嘢重特別啦！」果然，失明的Ocha積極樂觀，負起給人類快樂的重任，終於在亞洲動物基金主辦「2002狗隻成就大獎」中榮獲狗醫生成就大獎。頒獎禮當天Gigi異常興奮，甫回家鞋都未除即忙着替獎盃抹塵：「我覺得呢個獎就好似我哋嘅金紫荊獎，我做人都攞唔到，佢就攞到，我覺得佢好叻！」
出日：1991年2月27日
職業：狗醫生
品種：北京狗
家庭：3弟1妹
性格：HappyNature
威水史：上月榮獲「狗醫生狗隻成就大獎」
我都要做狗醫生
考試日期：約每年3月及10月（但排期面試都要成年）
入選資格：性格溫馴樂天、懂得與人相處，另需通過身體檢查
查詢：27912225（亞洲動物基金）
網址：