做厭老本行，在香港，除了忍下去，好像別無他法。但對朱太來說，卻柳暗花明。不願呆在香港對着停滯不前的美容生意，改將個人心頭好投資在番禺祈福新村一間小小的水晶店，小試牛刀投資八萬元，竟然首月便收支平衡，更重要是覷準內地巿場前途無量。背後動力，原來是仔仔要北上讀書……
記者：陳珮娟
攝影：楊錦文
鳴謝：祈福新村
踏進朱太在祈福新村商場只有70多呎的店舖，但見布置簡單，白色牆身配搭玻璃飾櫃，將水晶的光采完全誘發出來！朱太一邊忙着為客人穿水晶鏈，一邊回憶三個月前，全靠兒子幫忙決定開舖的事：
「我本來做美容生意，但覺得前景麻麻，眼見有朋友喺祈福開間舖好快回本，我又好鍾意水晶，心諗不如開番間水晶舖，但諗要中、港兩邊走，起初也心大心細。
「我嘅大仔14歲，比較獨立；細仔10歲，較為心散，剛巧開舖嘅朋友亦安排仔女在村內國際學校讀書，知道啲小朋友對活動教學好適應，於是我探朋友時，順道帶細仔去睇間學校，結果佢好鍾意，亦因為佢呢種反應，幫我做決定！」
幸運地，朱太成功地在八百份標書中，成為投得四間招標舖位的其中一間，但由中標至開張只得十多天時間籌備，對初次經營水晶生意及在大陸經商的朱太來說，又是另一種考驗！「當初真係好驚，對入貨門路又不太熟悉，我先生在港亦有工作在身，不能陪伴左右，成日要獨自一人在大陸走上走落，因為擔心及操勞，成個人瘦咗一圈，重好過去纖體！」
在旁的老公也忍不住插嘴道：「我哋用人肉搬運嘅方式運貨，就像螞蟻搬屋一樣慢，到開張那天，訂貨又未到，到咗嘅又唔夠，幸好有朋友仗義相助，借出一批飾物畀我哋擺賣，情況才不致那樣惡劣。𠵱家諗番起，都覺得有啲失禮！」現在，朱太已懂得應付買貨、賣貨等問題，還意外地在開業一個月後，達到收支平衡！
要取得成功，朱太稱要特別留意兩方面。「香港人的眼光非常銳利，揀貨要創新及多元化，例如我早前入了兩條瑪瑙鏈，款式頗為特別，只是放在櫥櫃中Display，兩小時內便賣出！」此外，朱太認為不能只以商家態度去對待顧客。「喺番禺嘅客人，無論係香港人或內地人，人情味好濃，幫襯我買水晶之外，就好似朋友，互換對水晶嘅心得及行情，我喺佢哋身上學識好多嘢，呢種關係，喺競爭力咁大嘅香港好難找到！」
硅晶石
閃閃生輝，很容易碎，可作辟邪之用。
鐵礦石
改善個人氣色，令氣場擴大，亦能辟邪。
水膽瑪瑙
如聚寶盆的外形不但能聚財，還可加強小飾物的能量。
冰種綠髮晶
港稱綠石榴，在最近展銷會才推出，戴得好的話，會愈戴愈清！
九色龜盤
有助旺財，明年的財位為西北方，可買回家放在西北位可保財運。
謝小姐：我本身好鍾意水晶，而幫襯她買水晶的最大原因是貨品比香港平，款式亦不俗，老闆娘重好好傾！
朱太認為國內水晶市場雖然慢熱，但極具前景，發現愈來愈多內地人喜歡水晶，並預期六個月後，舖頭有錢賺。「我好享受在大陸做生意，希望等生意站穩腳後，將大仔也接到番禺讀書，我就唔使中、港兩邊走，重可花多啲時間照顧佢哋！」
租金：?1,800（兩個月按金，一個月上期）
燈箱費：?1,500
水、電、車費等雜費：?3,000
入貨：約?13,000
裝修、冷氣及飾櫃等費用：?60,000
投資總額： 約?79,300
每月收入： 約?17,000