法律周噚日開幕，律政司司長梁愛詩同吳藹儀、李國能做主禮嘉賓。驟眼睇詩姐好似戴住條頸鏈，睇真啲，原來係一支鑲有玉石嘅金筆，好多場合詩姐都會戴住，不過估唔到周末着住T恤，詩姐都要掛住支筆。
其實詩姐出名工作狂，成日要有支筆喺身邊，方便隨時工作。八方都覺得，詩姐最好多做事、少說話，否則好似前兩日咁，話傳媒做賊，真係好難收科。講番呢支筆，一睇筆頂嘅六角形白星，就知係德國名牌萬寶龍（MontBlanc），價錢閒閒哋都上千甚至過萬。
法律周主題係「法律與青少年」，詩姐又被問到霆鋒單案，八方唔知班細路點睇，不過噚日會場豎立咗個六米高嘅吹氣法律天秤，風一吹就危危乎左搖右擺，重成日側埋一邊，咁樣睇，法律之前係咪人人平等？
傳真︰2623-9278
電郵︰