以前Johnny's事務所一向壟斷晒日本男偶像嘅Market，但係近年眼見w-inds、Flame同Lead呢股嘅HipHop𡃁仔樂團新勢力殺到埋身，就點都要重整旗鼓，快快手谷起班Johnny'sJr.，整多幾隊組合出嚟挽留啲淨係甘心洗錢喺偶像身上嘅女fans。
我大口羅拉一向有留意《POTATO》同《Duet》呢啲雜誌，發現Johnny's事務所呢期除咗歲數愈玩愈細之外，啲新嘅仔仔組合名重愈改愈騎呢。好似近排力捧緊嘅五人組Ya-Ya-Yah咁，可能好多母性澎湃嘅fans會覺得重未發育嘅成員藪宏太同赤間直哉好可愛，但我大口羅拉見到佢哋咁細個就要扮老積對住鏡頭賣笑，真係毛管都豎起晒，更加戥佢哋可憐。
查實Ya-Ya-Yah都未算係偶像極品XO，Johnny's有兩隊新仔組合，六個𡃁仔叫K.K.Kity，另一隊就更加求其到叫A.B.C.，個名娘到咁，真係該煨。