「聽到個消息好唔開心，從另一個角度睇，對佢係一種解脫，佢就會冇咁辛苦。我以前喺無綫做《BandBand咁嘅聲》時訪問過佢，佢鍾意應酬去蒲。佢嘅離開對我有好大啟發，我覺得以後應更要做多啲鍾意做嘅嘢，要趁重有時間嘅時候做想做嘅嘢。」
「羅文都好努力搏鬥，呢場仗喺心理上佢係贏咗，我之前都有去探過羅文，但探得多都對佢造成壓力，雖然見唔到佢最後一面，但可能係佢嘅心願呢，大家都知佢最貪靚，總之身後事我哋會全力配合，其實上一次喺瑪麗醫院，羅文已經同屋企人交代晒遺言。」
「籮記係我嘅至愛，我知佢有病時就開始食齋幫佢許願，希望佢身體健康，我會安排時間返香港。佢係不折不扣嘅美食主義者，完全冇戒口，我男友喺大陸帶咗四盒荔枝，佢一個人就食咗兩盒，佢份人好固執，百無禁忌，又獨立又豁達，有自己嘅生活。」
「我由細識佢識到大，以前同阿倫一齊同籮記夾Band，籮記做主，我哋做副，佢好好人，痛失呢個朋友，我好唔開心，我上個禮拜先去探過佢，佢叫我哋出殯時要着得靚靚哋，開開心心咁去佢喪禮，佢對自己嘅地位同得到嘅嘢都好滿足，冇遺憾。」
「我從朋友口中知道籮記去咗嘅消息，心情好複雜。我百變嘅形象唔多唔少受佢影響，得到好多啟示；做一個藝人，尤其係𠵱家嘅偶像派歌手，更應該效法籮記嘅精神；每次同佢一齊演出嘅時候，都會感到壓力同興奮，佢會令對手好投入，好想遇強愈強。」
「佢生存意志好頑強，最後都掙扎，對抗到底。我識籮記時已經覺得佢自創一格，無論表演同形象都領導潮流，拍寫真又扮女裝，佢係唯美主義，要求完美，走在時代尖端，領導潮流。」