阿松前晚單拖出席母校英華嘅「薈萃金曲夜」籌款晚宴，上集噚日八方已經講過，今次講埋下集。阿松去到跑馬地足球會，老友當然會多口問句，做乜唔帶埋松嫂一齊玩，阿松就話佢上咗北京，下次啦，有機會嘅！
可能老婆唔喺香港，阿松一支公玩到癲，聽金曲、飲紅酒當然唔少得，會場有個大舞池，阿松重落場跳埋懷舊舞，玩到十一點幾，可惜冇上台唱番首《獅子山下》。
除咗老友，阿松又見番佢話「面惡心善」嘅校長艾禮士先生，同埋教過佢嘅老師陳其湘。晚會最緊要梗係籌款，阿松好識做，一口氣捐咗十萬，認真愛護母校。其實英華明年落成嘅新校舍，捐夠三百萬就可以用你個名命名成幢教學大樓，捐十萬亦可以命名一間課室，唔知到時會唔會有間「梁錦松4A班房」？
傳真︰2623-9278
電郵︰