有時人又真係幾奇怪，兜兜轉轉最終都係覺得舊愛最好。好似𠝹女王咁，佢同舊愛早排分開咗，去追其他女仔。點知分開咗冇一陣，𠝹女王又主動搵番舊愛。不過，相處形式就唔同咗，以前佢重會帶舊愛去好朋友嘅私人派對，𠵱家佢哋走番埋一齊，比之前重秘密，見面嘅時候盡量得兩個人，連朋友都唔知佢哋復合，重租埋層樓畀個舊愛，方便見面。
其實佢哋分咗手之後，𠝹女王一樣有照顧舊愛，每個月照樣幫佢交卡數同搵老友安排佢做嘢，佢對舊愛算係咁！不過，佢就係衰花心，所以以前同舊愛成日離離合合，𠵱家佢同舊愛雖然係情侶，不過成日都要保持距離。其實佢呢位舊愛人品唔錯嘅，好心佢珍惜眼前人啦！
鍾麗緹喺未結婚同未生女之前，喺大家心目中係性感女神，但估唔到佢產後都依然保持得咁好。噚日鍾麗緹去上海出席「2002年MTV萊卡風尚頒獎大典」記者會，鍾麗緹着咗件露肩大領衫出現，當記者問佢點解着得咁性感時，鍾麗緹就主動拉高件衫，然後話：「咁就唔好睇啦。」今次鍾麗緹重帶埋囡囡去上海，既可以工作，又可以湊女。
好多人都知周杰倫唔鍾意着底褲，但F4成員吳建豪就覺得唔着底褲係佢一生人最尷尬嘅事。吳建豪早前同記者傾偈，講到遇過乜嘢尷尬事，吳建豪就話佢有一次登台，匆忙之下連底褲都唔記得着就走上台，佢話：「我演出的時候突然覺得怎麼涼涼的，才想起忘了穿內褲，好尷尬，也沒辦法，就這樣晃來晃去很不舒服但得忍着。」
吳建豪早前推出新碟，台灣銷量過咗七萬張。嚟緊隻新碟會改版，加入F4唱嘅廣告歌《AskforMore》同新歌MV嘅VCD，睇怕歌迷又要花錢買多隻啦！
陳慧琳（Kelly）同梁詠琪（GiGi）噚日分別喺外地公幹返港，兩個靚女都有fans嚟接機，但相比之下好似GiGi啲fans多少少。GiGi噚日下晝四點幾返港，有二十幾個fans將佢團團包圍，GiGi睇嚟好精神，佢男友鄭伊健為師傅羅文辭世好唔開心，不過GiGi就冇講啲乜。Kelly前日去上海，佢噚晚七點幾返嚟香港，不過比起GiGi，佢fans就少咗啲，得十幾個接機。Kelly戴住頂紅色冷帽，有型又可愛。