港股喺前星期五開始回升，升咗差唔多一成，喺𠵱家呢個水平去買藍籌股，可以上升嘅水位唔多，據市場班期指炒家所講，大市喺呢個位要造落嘅話，隨時可以有600零點，反而向上造就只有200點左右，所以佢哋已經隨時準備掉頭造淡，只爭在美股幾時回軟，打算買藍籌股博反彈嘅炒家要非常小心。
早前市場傳聞過有猛料跟尾嘅中建海爾（1169），似乎喺跟隨大圍市回落至0.12元水平後已經跌夠，唔經唔覺重喺上個禮拜五升返去0.13元。
隻股仔之前吹緊嘅注資行動聽聞重會繼續，有知情人同伏勝講，隻股仔嘅阿媽有啲嘢搞緊，好似係關隻1169事，不過同佢哋嘅本業無乜關係，話要玩業務多元化。咁發展落去，分分鐘畀佢哋做咗中國嘅「通用電氣」。線人話，海爾已經指到明話1169係佢哋喺香港嘅旗艦，有乜好嘢自然會先益佢，以中建海爾而家個價嚟睇，下跌空間有限，大家不妨諗吓之後會有啲乜嘢故事會發生。
呢排同國內有啲關係嘅上市公司都好似唔係好順利，好似歐亞（932）咁，停咗牌成兩個禮拜都未知幾時可以復牌，但凡事都有例外，好似和黃（013）同北控（392）一齊搞嘅北京旅遊發展公司，就公布攞到北京環球片場嘅項目。有班早前高價接咗大批辰達永安（1189）嘅大戶話，可能會去游說和黃同埋北控，希望可以留番啲肥水落隻辰達永安度，令到隻股仔有番生機，皆因和黃同北控同坐一條船，為咗要甩緊啲貨出街，有可能會有啲筍嘢益佢，借此嚟推番高個價，不過單嘢咁天馬行空，要伏勝相信其實都幾高難度。
伏勝