喺𠵱個商業社會，永遠冇免費午餐呢回事，要搵名人剪吓綵、講吓嘢，梗係要畀錢。香港班政壇猛人，請佢哋講嘢又要收幾銀呢？根據正式獲政府授權消息，原來要搵我哋行政會議成員梁振英講嘢，只要三千蚊人民幣兼一部手提電話就搞掂！
梁振英假假哋係行會前召集人，會唔會收咁平？八方絕冇作大，根據正式獲政府授權行會利益申報資料（梁司長咪將八方當賊），梁振英喺今年七月同八月，分別獲邀返大陸出席剪綵及洽商業務，均獲免費機票及住宿接待，呢樣嘢只要跟足申報，就冇乜問題。但最搞笑係今年九月，佢用戴德梁行主席身份，應深圳市規劃與國土資源局邀請，出席深圳秋季房地產交易會做主講嘉賓，事後有關方面「係咁易」送番三千蚊人民幣同部SonyEricssonT68i畀佢！
梁振英假假哋都係行會大哥，三千蚊就真係超級友情價。
不過，睇番今次更新利益申報，呢班新班子要申報埋物業地址，真係個個好有錢，淨係睇「校長」李國章，四十四個物業，四十三個喺尖沙嘴，對於佢哋，一萬幾千算乜！
傳真︰2623-9278
電郵︰