【本報訊】一代歌聖羅文病逝，演藝界同聲一哭，而追隨了羅文二十四年的長情歌迷小菁更是傷心欲絕。小菁起初是羅文的歌迷，最後變成了羅文的好友；前日羅文彌留之際，小菁趕到醫院送羅文最後一程，昨天小菁說臨終前一刻的羅文仍然堅強，她在電話中嗚咽說，羅文彌留之際，寧願痛得撕心裂肺也不願妥協打嗎啡針止痛；見狀心如刀割的小菁對羅文說「不如去吧」，羅文立即睜大眼睛，搖手拒絕。而羅文的前助手Terry接受傳媒訪問時則表示：「羅文最後一啖氣好長。」 記者：陳月媚
四十多歲的小菁也是另一位歌手黎明的誼母，她昨日接受電話訪問說：「一九七八年，因為羅文唱歌好聽，台型又好，所以我就好迷佢。後來同佢見得多，之後更做埋好朋友，佢對歌迷好到不得了，佢對我嘅家庭都好關心。不過喺去年五月一日我收到佢電話，佢話肝部有惡性腫瘤，要入院再做檢查。佢嘅語氣好似喺度講緊一件閒事，但我聽到就好擔心。」
去年羅文病情惡化後，小菁一直支持和關心他，前日中午十二時小菁趕到瑪麗醫院，看見正在彌留的羅文時，心裏難過得就像刀割，羅文卻顯得清醒和堅強，還很關心周遭的朋友。
小菁在電話中哭着說：「我同另一羅文歌迷玲姐對『籮記』講，你放心去啦！我哋都知道肝癌會好痛，但係佢點都唔肯打嗎啡針止痛，佢話打嗎啡針就等如妥協，所以寧願痛都要保持清醒。我哋見佢咁痛，唔想佢咁辛苦，叫佢乖乖哋去吧！點知佢唔鍾意，對眼睜得好大，又搖一吓手。」
小菁佩服羅文信念頑強，一直深信只要堅持，定可克服癌魔。羅文入院前，小菁帶同在英國牛津大學念法律的兒子到羅文家作客，羅文對小菁說：「過埋重陽，我會冇事啦！一定會好得番。有病咪醫囉！唔係咁大件事，我𠵱家得到嘅嘢完全係因為我嘅堅持信念至會成功。」
在小菁認識的朋友當中，她自言沒有一位比羅文更堅強：雖然身罹癌症，但仍然樂觀認為自己會康復。
在羅文最後一次入醫院後，小菁去醫院探病，他還對小菁說笑話：「醫生話我太肚餓，餓到連肝嗰粒瘤都冇咗啦！」小菁說：「當時佢重有心情講笑，但我真係笑唔出。但係我唔敢喺佢面前喊，離開醫院門口先至喊出嚟。」