一位熱心讀者吳女士打電話到《蘋果日報》投訴，指左丁山上星期日（十月十三日）講陳水扁個孫嘅八字有不對地方。據投訴記錄，吳女士話八月係以農曆計算，左丁山寫錯咗。咦，拿原文一睇，我明明係寫「八月戊土、金洩身寒」；又話「八月金（酉金）旺……」㗎，邊度有寫錯，八月當然係農曆八月啦，唔通係西曆八月咩？陳水扁孫兒（據《蘋果日報》報道）喺二○○二年十月七日出世，十月七日係農曆九月初二。唔好又鬧我哋寫錯農曆八月噃，因為算命計月份，要依足節氣，要過咗「寒露」先至算係農曆九月。「寒露」喺十月八日十九時十分降臨（據商務《100年袖珍干支月曆》，編者劉寶琳），即十月八日下午七時十分後出生，就算係農曆九月（庚戍月）出生；之前算係農曆八月（己酉月）出生，台灣咁多算命專家，點會同陳水扁女兒計錯數，佢哋一早算好喺邊日邊個時辰剖腹取子。不過，實際出生時辰就好抿，遲十分鐘就差啲。
既然可以剖腹取子，就可以計定晒數，人人都有條好命，八字算命冇晒用啦。此又不然，一來有人唔信，二來即使搵專家計數，亦會有意想不到嘅阻滯，嬰兒未必可如計劃時間出世，可能早咗，亦可能遲少少，因為醫生要顧住母親健康，唔可以監粗嚟。計我話，呢啲命運之言，信則有，不信則無，不可強求。陳水扁以總統之尊而強求，大家不妨以後留意佢位乖孫嘅命運。