台灣人氣組合F4𠵱家除咗忙緊拍《流星花園Ⅱ》之外，重會喺下個月開巡迴演唱會，佢哋會喺下個月二十三號唱廣州站。
康泰旅行社就把握機會賺錢，特登搞咗個兩日一夜團去廣州睇演唱會，個團重分咗五級，最貴嗰隻包前五行嘅貴賓飛，同F4住同一間五星級酒店，頭一百個報名，重可以參加演唱會慶功㖭！一個人要二千三百幾蚊，真係去台灣三日兩夜都唔使咁貴！
不過都有啲平啲嘅團，包三百蚊嘅演唱會飛同住其他酒店，就九百幾蚊。旅行社重特登安排今朝十點鐘開始，喺上環嘅門市接受報名，連旅行社都要出奇招，真係生意難做。
另外，之前印尼峇里島發生恐佈襲擊事件，不過F4無懼危險，喺下年一月照去印尼雅加達開兩場演唱會。有傳F4嘅巡迴演唱會，以印尼呢兩場嘅酬勞最高，一場有成一百萬美金（約七百八十萬港元）咁多，唔怪得佢四個唔怕死都要去啦！
噚日機場星光熠熠，陳慧琳、黎明、林嘉欣、梁朝偉同古天樂分別出現離境大堂，離開香港。啱啱攞完傑青嘅陳慧琳，噚日精神好好，但係因為冇化妝，佢一見記者影相就雞咁腳走，重話：「遠啲影，遠啲影，我冇化妝呀。」唔好以為陳慧琳攞咗傑青就特別顧個樣，其實佢不嬲都好怕人影到佢憔悴嘅樣。不過佢都好友善咁叫你唔好影大頭，臨走時重同記者講拜拜。
李克勤（左）帶埋女友盧淑儀同梁榮忠去美國登台，問李克勤去邊，佢攬住梁榮忠話：「我哋去拉斯維加斯結婚呀。」點知盧淑儀正行緊嚟，李克勤見到好鬼尷尬。
另外，噚日有段新聞講九龍塘雲慈慧海功德會發生騙財騙色案，原來張學友係呢個會嘅主席，佢噚日出現機場要去武漢公幹，問學友知唔知呢單嘢，佢聽完就話：「唔清楚。」
有個都幾紅嘅中年男藝人，平日就風度翩翩，但係原來佢乜都貪得一餐。電視台嘅戶外活動，好多時都有啲禮物送畀觀眾，好似鉛筆、間尺咁，中年藝人乜都要，知佢喜好嘅公關通常都會留定啲贈品畀佢。不過，有一次個公關唔記得咗，俾個中年藝人鬧到狗血淋頭，馮仁昭都戥個公關慘！
陳豪噚日帶埋大堆嘢去新城電台做訪問，其中包括手表、戒指同一架模型車，陳豪話：「主持叫我帶啲心愛嘅嘢嚟講吓，我呢隻戒指（紅圈示）係朋友送嘅，有神力㗎，我戴咗呢隻戒指之後，其他戒指都唔見晒。」
提到新劇《絕世好爸》收視唔錯，陳豪就話：「我怕觀眾睇完唔鍾意，點知反應咁好，我唔使再擔心啦！」