活在精神病陰霾下十多年的黃潔霞，日前終抵不住病魔煎熬，在寓所外走廊跳樓身亡，其夫劉漢興痛失愛妻之餘，復因患上糖尿病導致視力受損，無法繼續的士司機工作，現已欠租三個月，面臨失去家園的厄運。
三十年夫妻感情驟然告終，對於五十六歲的興叔來說，是一種不能承受的痛。
「當日我放工返屋企，樓下有好多差人同救護車，我見到地下有一灘血，旁邊重有我老婆一隻拖鞋，我已經估到乜事，即刻發狂咁衝上樓，知道佢真係喺走廊跳樓。」興叔憶起當日情景，沒有老淚縱橫的激動，只是用手輕輕拍額，眉宇間流露一股說不出的哀傷。
興叔透露，他與四十六歲的妻子早年於內地結婚，婚後育有一子一女，二十四歲長女已出嫁，十九歲兒子現正預備高級程度會考。其妻於十二年前疑因不堪生活壓力而患上精神分裂症，自此在她的世界只有病魔和藥物，還有一股揮之不去的自殺念頭。
「佢之前已經試過好幾次自殺，個仔讀緊小學一年級時，佢曾經打算攬埋個仔一齊跳樓，好彩及時阻止。佢又成日話個病醫極都醫唔好，做人都冇意思，我勸極佢都冇用。我從來都冇嫌棄佢，只係愛護同擔心佢！」興叔歎道。
社會福利署已撥出殮葬津貼予興叔辦理亡妻身後事，另外給他數千元緊急援助金，作為本月的生活費，綜援金預計下月可正式發放。
然而，原職通宵更的士司機的興叔，近年因為經濟不景，生意大受打擊，每天「晚七朝七」辛勤工作，有時只能賺回車租，以致欠下公屋租金三個月，合共四千餘元，房屋署已向其發出最後警告，必須盡早清繳欠租，否則有可能會收回單位。
「我又唔夠啲後生仔眼明手快識搶客，有時一晚生意額得四百幾蚊，扣除三百幾蚊車租同石油氣費，真係分分鐘白做，近排都係搵得千幾蚊一個月。」興叔說。
自年前患上糖尿病後，興叔的體力及視力大不如前，為免發生危險，近日他已決定退休。另外，其子阿輝去年高級程度會考成績未如理想，今年以自修生身份報考，要交二千餘元考試費，興叔在別無選擇下，只好硬着頭皮向其的士車主借錢予兒子繳費。
蘋果日報慈善基金有見興叔的困境，即時撥款六千零二十五元，助他繳付欠租及兒子高考考試費。
捐款編號：C0719
暖流熱線
電話：29908688
傳真：23702192
電郵：
網址：