有時名牌外資行，亦未必係信心保證，好似捷美能源（702）由一間以推介民企股出名嘅歐資證券行負責，但隻股由佢哋推介開始至今，已經由1元水平，跌至家陣45仙，成交則愈見稀疏，究竟係投資者唔識貨，抑或係大行支笛唔靈？小初真係唔識答。
經紀陳都話有同感，佢重講咗一個古仔畀小初聽，佢話舊年有隻股叫做中國航空技術（232），曾經有過非常風光日子，而當日炒呢隻股嘅幕後炒家剛剛埋班，但初試啼聲就有非常好成績，所以成班人雄心壯志。
呢班炒家人才濟濟，捷美亦係佢哋力作之一，但可惜早排燃氣股雖然曾經炒得非常精采，但呢班炒家卻無法乘機散貨，市場傳聞佢哋到今時今日重係成手貨。現時捷美嘅買賣盤，亦周不時見到呢班炒家嘅手影，但市場就盛傳，佢哋手上子彈已經所剩無幾，真係信不信由你。
慕容小初