八方講過英華書院搞「英華薈萃金曲夜」籌款，校長楊寶坤希望籌到六十萬，跑馬地足球會噚晚雲集英華校友，最知名嘅校友梁錦松做主禮嘉賓，原來大家都期待佢帶松嫂出席，見吓班老友，點知佢偏偏單拖出現。
不過噚晚氣氛就認真好，會場樓底特別高，有啲似學校大禮堂，頭頂布置咗七彩布帶，不停播放六、七十年代嘅歐西流行曲，加上泰迪羅賓、陳任、曾路得、區瑞強及許冠英等大唱懷舊金曲，一時間令人好似回到當年嘅黃金歲月咁。
阿松致辭時慨歎：「滄海桑田，人事變遷，原是人生常態」，又話香港正處於「變世之局，或許會經歷一陣顛簸」，但佢話積極啲睇，係一次「萬象更新之兆」。
面對天地不仁，阿松引用老子道德經「虛而不屈，動而愈出」勉勵大家。
英華書院創校重早過香港開埠，1818年就喺馬六甲成立，校長楊寶坤明年遷入深水埗新校後就會退休，佢形容好似生咗個BB，要交畀人湊大。
噚晚捧場校友除咗阿松，重有廖長城、胡國興法官等，嘉賓則有梁愛詩。
傳真︰2623-9278
電郵︰