教育界朋友來電：「喂，諗諗吓，份工唔知穩唔穩陣，都係想盡早送走個女去美國讀社區學院，再轉大學，希望可以慳番一年時間，我雖係教育界，但對本地教育愈來愈冇信心，自己亦唔知會唔會俾cut走，都係要為個女計算好至得。」
去美國讀社區學院，早去早着。原因好簡單，香港要斬教育經費（九億元），大學勒緊皮帶，美國州立大學何嘗不然。啱啱十月十五日《國際先鋒論壇報》一篇文章話，美國經濟不景，四十一個州有財赤，惟有大削預算。北卡羅來納州就要在下一年度削減一億二千四百萬美元嘅大學經費，少咗政府津貼，大學惟有加學費，今年全美州立大學學費嘅平均加幅係7%，遠遠高於通帳率。
此外，好多人搵唔到工，湧返社區學院讀書，逼爆校園。美國人讀社區學院因為（一）易入，譬如加州一百○八間社區學院有法律規定，不能拒收加州中學畢業生；（二）學費便宜；（三）兩年畢業，夠快。因此咯喎，社區學院只能有幾個選擇：（一）設學生人數上限，（二）加學費，（三）索性取消一啲冷門課程慳資源，冇一樣對遲入學嘅學生有利。好難怪嘅，加州社區學院（一百○八個校園）今年學生人數增加百分之六點九，洛杉磯地區增加百分之八點六，全州社區學院總學生人數高達一百七十九萬人，所以加州社區學院總監ThomasNussbaum話以後只能（一）加學費，（二）少收學生。香港家長想送子女過去，要明白呢個趨勢。