一直以嚟《WE》系列一路都係由水貨入口，所以新Game上場時價錢都係高企，不過鐵人最近收到消息，有某代理已經同K記密斟密斟，相信最快可以由年尾隻《WINNINGELEVEN6FinalEdition》開始推出行貨，如果消息屬實真係機迷之福，起碼唔使再捱貴貨。
10月Game場完全冇大作撐場，但11月各主機各遊戲生產商都排住隊出招，CAPCOM都唔例外，佢哋除咗格鬥Game出色之外，RPGGame亦有《BreathOfFire》呢個極受歡受嘅系列，呢隻遊戲曾經喺超任、PS、GBA等主機推出過，最新一集會於11月14日喺PS2上登陸，行貨重附送初回贈品。此外，CAPCOM隻《CATANCardGame》中文版已經到咗香港，呢隻被譽為大富翁之後嘅矚目桌上遊戲，遲吓重會移植到家用主機上，有興趣不妨買盒試吓。
今個星期冇特別大作推出，所以PS2同GBA隻《SilentScope》就順利跑出，呢隻Game最初是在街機登場，大大支狙擊槍，要玩家冷靜地一槍一槍射殺敵人，有別於當時流行狂射嘅槍Game，大受歡受，之後亦曾移植到家用機，上次同今次一樣，家用版都係用普通手掣玩，有咗支狙擊槍。𠵱家市價分別係$350同$260左右。
微軟喺北美推出咗一輪最新攻勢，主機連兩隻遊戲賣200美元有找，咁計落都係1,600蚊港紙有找，以主機咁強嘅機能嚟計真係扺到爆，香港行貨就要遲啲先公布價錢，不過據消息透露，遊戲會定喺200至300港元之間，到底實情如何，年底就知道。