標普期指噚日下午突然回軟，市場突然憂慮美股累積升幅過巨，將行回吐，令到港股午市亦回軟，升幅收窄至36點，收報9613，成交則達99億元，反映下午沽壓唔細，投資者似乎唔多想持倉過周末。
近期全球不斷出現恐怖襲擊，令人唔知幾時會再出現單類似911咁嚴重嘅襲擊個案，投資者存有戒心亦可理解。
最近國企及民企股持續造好，噚日大成生化（809）升9.89%，重上2元收市；超大現代（682）升8.6%，收報2.20元，格林柯爾（8056）更勁升18.18%，收0.65；具注資概念的東方航空（670）升7.14%％，收1.05元，南方航空（1055）亦升2.5%，收2.075元，升勢頗為全面。
有消息話，國內有機構投資者開始調資金來港趁低吸納，但唔知真定假？不過，現時國內稅務總局要取消地方政府越權提供的企業稅務優惠，勢必打擊中國概念股投資氣氛，今次民企及國企反彈可以持續幾耐，實在值得懷疑。
前日勁跌逾50%之易貿通（8163）噚日經阿虎「提點」後，即刻勁升189%，收報5.2仙，市值由720萬元大升至2080萬元，終於較為似樣。唔知係咪有人不滿阿虎嘅言論，用9344元托高股價，以示抗議呢？
東北電（042）H股噚日復牌，雖一度跌逾20%，低見0.47元，不過收市時跌幅已收窄至8.33%，收報0.55元，成交只得1464萬股，相信要跳車嘅人已經跳晒，後市如無意外，股價應可望喘定。
阿虎