恒指昨日先高後低，收9613，以近99億大成交僅升36點，走勢麻麻；期指更難睇，唔止高開低收，重要倒跌，睇嚟大市短期難免調整。
由上周低位8772至昨日高位9744，恒指已回升近千點，回番多少天公地道，如果外圍冇乜大件事發生，估計落到去9300至9400水平，個市又會彈過，到時又可以向啲藍籌Call輪埋手，𠵱家就最好唞番幾日。
如果手癢難耐，係都要炒，短線都係炒Put輪勝算高啲。不過，照睇個市只係調整而唔係轉勢，故此炒Put輪切記要手快，不論輸贏，計數都要快，千祈咪長情。
賭大市調整，玩恒指Put輪最簡單，9444同9448最多人玩，數據可以接受。超短線操作，最緊要買賣易，一於喺呢兩件中揀。
納指近期升番唔少，帶動本地科技股回升，品質國際（243）昨日最高1.71元，尾段隨大市回順至1.65元收，仍升3%。品質有隻公司輪609，是日由4.8仙飛上6.2仙，大升29%，成交11張金牛。609去到04年至到期，但行使價6.25元有排未到，溢價去到282%，點玩？睇好品質嘅話，都係買正股實際啲。
章盛