發展商搞記者會促銷樓盤愈來愈花心思。好似永泰亞洲九龍塘陶源，一直以濃厚中國傳統文化氣息作包裝，以「大戶芳華」來形容物業擁有嘅優裕生活。為咗表揚中原地產落力促銷，佔物業總銷售量六成，發展商特意頒贈獎品畀中原。永泰亞洲李太李簡鳳玲就更有心思，專程誠邀上海名畫家張海天，畫咗幅《陶源圖》掛畫送畀中原。李太話，呢份紀念品別具紀念價值。獲如此厚禮，中原一姐劉瑛琳甜在心頭。
頒獎地方自然就地取材，喺陶源現址會所。發展商安排在戶外泳池旁舉行儀式，還特地找來前富麗華酒店著名酒廊女歌手獻唱，除咗經典名曲，重可以點唱。一眾中原高層同埋手足，齊齊在風和日麗嘅天氣下，喺池畔欣賞名曲，聽出耳油。
買內地樓做樓按再唔使咁頻撲，因為東亞銀行嘅香港全部分行，都可以代內地分行接受按揭申請。東亞香港分行有109間。
以前東亞只係內地分行或者香港總行先至收按揭申請表，今後除咗所有分行可申請外，買家重可以上網交申請表，買家重可以揀用人民幣、港元同美元借款。
銀行為咗搶本地樓按市場，已經乜嘢招數都出齊，就算搶到生意都冇乜肉食。但反觀內地樓市愈嚟愈旺，自然希望開拓新市場，利錢點都會好過香港，況且買家都係香港人，唔還錢嘅比例一向都唔高，可以講話賺梗嘅。睇嚟銀行搶客戰，好快會由本港轉到內地。
「遠親不如近鄰」呢句話好多人都聽過，街坊街里有照應，點都好啲，但若果係親戚，又住埋附近就更加理想。南豐發展嘅荃灣翠豐臺，就有呢個情形。
中原梁寶玲話，兩個原本住喺青衣同荃灣嘅親戚，兩個禮拜前一齊參觀翠豐臺示範單位，覺得單位設計唔錯，售價又吸引，所以齊齊決定入市，一個以146萬蚊，揀咗個1座高層B室，面積五百八十呎，採即供方法付款。而另一個則以167萬買咗隔籬嘅A室，約六百呎，因為用零首期同二按，售價貴咗5%。
香港人買樓，好多時會住近啲親戚朋友，呢啲情況最高興梗係發展商啦，因為可賣多啲單位；而代理亦可靠熟客介紹，做多啲生意，總之係大家開心啦。
𠵱家事事講求效益同增值，香港置業就將請人同提供資訊夾埋一齊做，由今日起一連三日，佢哋喺將軍澳地鐵坑口站開設「香港置業資訊月台」，一方面用嚟做招聘站，即場請物業顧問、見習營業員同後勤員工面試，另一方面就做新盤、二手盤同租盤資訊站，實行嚟一招大包圍，一次過網羅所有客源。
市道唔好，加上買家嘅素質愈嚟愈高，有啲要住得與別不同。發展商為樓盤做好多唔同主題嘅宣傳活動同埋宣傳短片。佢哋marketingteam嘅努力都得到回報，除咗成功𠱁到買家入市外，重攞咗唔少宣傳獎項。
今年香港興業就憑愉景灣海澄湖畔一期嘅「不一樣的童年，不一樣的生活」主題，攞到香港管理專業協會嘅「2002年傑出市場策劃獎銅獎」及「優異電視推廣策劃獎」。諗番舊年，新鴻基地產重威，憑跑馬山禮頓山「一個貴族的誕生」做宣傳主題，就攞咗金獎兼賣清幾百個單位。另外，兩三年前，長實盈翠半島同太古星域軒都得過獎。
國際財經雜誌《亞洲貨幣》最近做咗個調查，選出新地為亞太區「最佳企業管治」地產公司第一名，難怪新地副主席郭三少炳聯聽到之後好興奮。
為咗保住呢個名聲，郭三少重話公司會致力保持優秀管理同高水平管治，重視高透明度，同第一時間披露公司重要資訊，強調要確保所披露嘅財務資料準確可靠。
原來新地發布新聞稿之後十分鐘，篇稿就會上網；而業績報告就喺董事局通過後半個鐘上網。睇嚟新地個金漆招牌都好值錢喎！
蘭西
電郵地址：