馬主N近來馬運麻麻，隻馬搏殺，失運又失手，星期四入馬房仄馬，星期五下午就約練馬師飲茶，搵埋馬主H去共商大計。馬主同練馬師飲下午茶，最常去嘅地方就係文華酒店ClipperLounge，呢度經常都見到馬主練馬師鬼佬騎師出入嘅。
三個人點咗一杯凍檸茶、一杯甘笋汁、一個下午茶（teaset），練馬師叫多一客凱撒沙律加凍朱古力，馬主H飲光甘笋汁，再叫一壺EarlGrey。埋單時候，梗係馬主找數啦，馬主H大筆一簽，連貼士、加一，就與六百蚊講拜拜。
去得文華飲下午茶，當然唔理會價錢，但馬主H喺星期六早上睇電視睇到一位「青馬管理」員工爬上高處嘅新聞，不禁有啲感觸，社會上嘅不景氣甚為擴散，裁員減薪嘅事情，日日都有，政府托樓市，堅持聯繫滙率之餘，失業減薪之事，肯定不會減少。《蘋果》報道有人在快餐店食剩餘食物嘅事，早已有之，不過呢次係第一次上報紙而已。
人家為四千零蚊人工而一時睇唔開，馬主H與人飲一次下午茶就用六百蚊，星期日下午經過九龍城，睇見賣二百幾蚊一隻滷水鵝、八十蚊一塊魚片嘅食店門口排滿人，當然了解到香港社會快速兩極化，劉兆佳教授做咗智囊，搵老友關信基教授研究甚麼社會凝聚力，實在係好難；失業減薪再持續下去嘅話，恐怕「國際歌」會成為凝聚力！