我求大俠不嬲實事求是，但今日真係想同大家講吓大迷信：原來響過去百年歷史，逢親英格蘭第一次用某個球場作為主場地，都一定贏波；而英軍響禮拜三對馬其頓，正正係首次用修咸頓嘅聖瑪莉球場做主場，結果英格蘭樣衰衰咁迫和馬其頓，破咗數據。唔通係聖瑪莉風水唔好？
修咸頓個場畀國家隊徵用，佢哋會長賽前不知幾興奮，經過今場波，睇怕以後個場都唔使旨意再被徵用。另一樣嘢重搞鬼，六六年世界盃北韓贏意大利，成為爆冷經典，呢班「爆冷兵團」到米字國做親善訪問之餘，重去咗聖瑪莉睇波，結果場波爆冷，唔知關唔關佢哋事嘞。
金色轟炸機奇連士文前日失驚無神話英格蘭應重召舒寧咸，當時我求大俠覺得佢無嘢講搵嘢嚟講。之但係睇完英格蘭對馬其頓之後，諗起英軍前鋒好似華素爾同埋阿倫史密夫真係重未夠班應付國際賽，就知道奇連士文並唔係無的放矢。老舒都無話退出國際賽吖，艾歷臣諗諗佢好噃。
德甲過氣勁旅凱沙羅頓嘅財政狀況真係衰到貼地，近日為咗五百萬歐元借貸，居然將前鋒高路斯個轉會權抵押畀地方彩票局；即係話，如果凱沙羅頓還唔到債而要賣走高路斯嘅話，轉會費就盡歸彩票局所有，枉凱沙羅頓個會長贊基重成日叫球迷放心。睇怕行到呢步棋，班波重有無得救大家心裏有數。
意大利鎩羽後，意球迷焦點隨即放在周六國米大戰祖記。講起祖記就慘，佢哋忙於用專機接班國腳返意大利；國米就梳乎得多，由於多數主將都無踢國際賽，而韋利又以傷為理由免役，據講𠵱家不知操得幾弗。最過癮係會方重有閒情特登響賽前推出首新隊歌，希望造勢咁話喎。表面睇嚟，國米備戰真係好好多。
綜合禮拜三咁多場國際賽，好幾隊強隊都失威，尤其係歐洲四大聯賽（即西、意、英、德）嘅都無隊踢得好，反映呢啲國家隊嘅主力疲於奔命，無可能長期踢得好，歐洲足協真係要疏導一下賽程。最令我求大俠擔心係四國聯賽主力踢殘，周末本來有好幾場矚目戲碼隨時變殘兵大戰，非球迷之福。