經紀李請客到時代廣場食飯，竟然發現老名牌百貨「連記」喺十樓食肆隔籬開減價散貨場，都算係哀歌，「連記」話晒係香港版Harrods，唔少高官政要幫襯，𠵱家竟然喺食肆群中開減價場，難免有點不得體。
老名牌亂陣腳，靚仔名牌卻愈戰愈勇。聽講又有日本名牌來港大展拳腳，呢個牌子喺日本唔小嘢，日本國內周圍有分店，每年營業額穩佔日本全國頭二、三位（第一位當然係LV，生產額拍住LV，可想而知規模唔小嘢）。
經紀李：「呢間公司搞包裝好叻，為搞宣傳店內賣埋雪糕，有三、四十款雪糕揀，唔係為提供不同味道畀人，原來做多啲唔同顏色雪糕，為襯番唔同客人形象，呢條橋都算絕。
「大人細路衫都有出，嗰季興乜就出乜設計，話之人哋話跟風，冇晒包袱，不過又有自己風格，最出名係沉色嘅黑黑灰灰衫，啱晒日本人口味。
「聽講佢哋諗過好多次想打入香港市場，對上一次係金融風暴前，終於𠵱家才成事。揀呢個時候來港，唔知有乜玄機。」同枱食飯嘅哈囉民話：「唔係噃，呢個牌子未有翻版，應該唔算紅喎。」哈囉民以翻版測名牌知名程度又係高招。
聽講哈囉民最近被人屈打成招，差啲發生冤獄事件，睇嚟呢幾年香港人真係冇運行。
主持人：大食Jack
八卦熱報：