東君化工（362）今日公布業績，之前有心人四圍唱業績一定好，小初對此唔懷疑，但與此同時，小初就聽到另外一啲消息，想同大家分享吓。
東君近日股價開始造好，噚日再升5.48%，收38.5仙，成交585萬元。
不過，經紀陳話，東君幕後炒家日日炒來炒去，使費龐大，其實都頂得相當辛苦，雖然乜嘢口術都出齊，亦散唔到好多貨。炒家有見及此，近日四出與唔同嘅證券行會面，希望開新Creditline，搵多少新水支持，連佢亦曾經被聯絡過。
東君傳聞會變身做大慶市窗口公司，其實已經傳咗好耐，當時重講到公司會改名做大慶化工，同埋委任一些幹部級人馬加入董事會，以示雙方關係密切，但搞嚟搞去，始終都係只聞樓梯響，不見人下來，令捧場客失望。
之後公司不時出嚟吹水，話已經簽咗好大銀碼嘅定單，但大市氣氛差，市場反應平淡，引唔到人落場跟炒，唔怪得幕後班炒手咁辛苦。
慕容小初