港股噚日表現甚為反覆，早市先升後回，市場對於恐怖襲擊蔓延至亞洲區有一定戒心，但恒指最後因IBM在歐洲勁升，以及市場憧憬美股周四晚會回升，再次重返9500水平之上，收報9576，升117點。
新世界（017）、新基（301）及太港（659）全系停牌，市場傳出新世界今日公布業績時，會公布將新基股份當股息派畀股東，以後不再持有新基，亦即新基之龐大負債，不會再綜合在新世界之帳目內，從而達到減債目的。雖然此舉會令新世界盤數靚啲，不過對於專業投資者而言，此舉對新世界或新基都冇特別益處，不會因此而重估其投資價值。
易貿通（8163）股價噚日勁跌59%，收報1.8仙，但成交極為稀疏，僅4000股。此股確跌得奇怪，由3月7日上市至今，已較招股價0.50元大跌96.4%，如此跌幅，好似公司就快執笠咁款。睇番資料，佢上市時集資淨額都有2000萬元，以首季蝕139萬元計，假設全年蝕夠556萬元，照計重蝕剩1444萬元，但以昨日收市價計，成間公司市值只得720萬元，究竟係股價跌過籠抑或已經出咗意外？黑客話，呢間公司甚為低調，外間對公司所知不多，班炒家於5至6月間炒咗一轉散清貨後，就冇人再理此股，任由股價乾跌。
松日通訊（283）噚日股價勁升20%，收報0.37元。此股一直盛傳會獲大股東松日電子集團注資，本月初公司以先舊後新方式配售1.2億股，每股0.20元，集資2356萬元。據聞呢一次批股是批畀有心人士，將股價挾高，再進行注資及新一輪配股行動。
阿虎