女星去汶萊搵錢就聽得多，但估唔到𠵱家連男人都爭住過去掘金，重要好高姿態咁帶一團人過去，都咪話唔巴閉。係邊個咁勁，之唔係四大天王之一嘅張學友，佢今個月十一號喺汶萊開演唱會，汶萊係佢巡迴演唱會嘅其中一站。當晚場館嗰四千幾個座位全部爆晒，座無虛席。
汶萊個二十八歲靚仔王子，原來都係學友嘅歌迷，佢全程親自接待學友，完場之後重用佢架勞斯萊斯送學友返酒店。之後，佢哋一齊食飯，王子重坐喺學友隔籬，而為學友伴舞嘅女舞蹈藝員好瘋狂，爭住坐學友隔籬，重同學友影合照。
學友呢個演唱會俾當地傳媒大事報道，登喺頭版，都咪話唔威水！而巡迴演唱會嘅主辦人陳淑芬就話學友係第一個香港歌手正式喺汶萊開演唱會，希望遲啲可以有多啲歌手去嗰邊發展，因為嗰邊個市場好大。
吳君如噚日喺尖沙嘴大富豪夜總會出席電影《金雞正傳》記者會，君如重特登着咗件胸前有雙蛋嘅衫出現，搞到全場大笑。為咗套戲君如重特登增肥十磅，佢話：「因為戲裏面我係飾演八十年代嘅妓女，所以要肥少少。」君如喺戲入面同十八個男人有床上戲，問到導演兼佢男友陳可辛會唔會飾演其中一角，佢就話：「我要嫖，都唔要吳君如啦！」
劉德華同中建麥紹棠單官司搞咗好耐都未有進展，點知噚日有消息話華仔同麥紹棠俾官司煩擾咁耐都唔想再煩落去，卒之傾掂數庭外和解，重話噚日會開記者會宣布和解消息。
不過，記者會就冇開到，華仔嗰邊都冇人走出嚟話和解咗。華仔經助手陳小姐話佢暫時唔會就呢件事作回應，有冇和解都唔講住喎！
梅小惠嘅亡父梅沃文噚日朝早九點喺九龍殯儀館正式出殯，遺體運到柴灣哥連臣角火葬。梅小惠同家姐梅小青一直表現得好堅強，不過到大殮嘅時候終於忍唔住喊咗出嚟。雖然小惠之前講明唔接受訪問，但一見到記者依然有禮貌咁話：「多謝大家！」
蕭正楠（Edwin）係周星馳fans，佢近日終於喺唱片公司協助下，搵星爺幫佢拍最新歌曲MV。今次星爺重會同合作開嘅製作人員幫Edwin操刀。另外，星爺會幫Edwin度身訂做一個新形象。Edwin話：「我一直都好欣賞星爺做戲，今次佢肯幫我拍MV，真係好開心，希望出嚟嘅效果好，歌迷會鍾意。」