日本嘅漫畫雜誌，經常都會搵啲性感女星拍吓水着相做封面，吸引啲血氣方剛嘅少年讀者。曾經爆出《鐵拳浪子》同《金田一少年事件簿》嘅《周刊少年Magazine》，近期玩嘅增刊號，直頭成本齋sell水着靚女。作為今期壓軸靚女嘅吉岡美穗，佢輯相重拍到好似漫畫咁有故事性。
被譽為「新一代療傷女皇」嘅吉岡美穗，喺本書入面做咗個成三十頁嘅專題故事，主題叫做「美穗姐姐個人指導的SwimmingSchool」，攝影師跟到佢實，拍低咗吉岡美穗由入更衣室除衫到換上泳衣落水嘅情況。唔使問啲男fans一定一路睇一路心跳加速！
雖然吉岡美穗美其名話私人教授游水，但睇嚟佢都知啲人只係想睇佢性感照，所以並冇花氣力教人游乜式物式，反而大騷唔同款式嘅泳衣，重高興到喺水池旁邊玩呼拉圈㖭！