患情緒抑鬱的阿芬，因丈夫有婚外情令經濟頓失所依，目前正面對被截電及欠交租金困境，又無力為就讀小一的六歲半女兒訂購冬季校服，境況堪憐。蘋果慈善基金即時撥款助她應付短暫生活急需。
面容憔悴的阿芬向到訪的記者歎道：「呢排天氣轉涼，囡囡以前着開啲長袖衫褲已經唔啱着，我惟有問親戚攞住幾件舊衫舊褲畀佢着住保暖，唔使凍嚫。但囡囡就快要換冬季校服返學，我問唔到佢學校啲舊生攞套舊校服，又冇錢幫佢買，一套新嘅冬季校服包括校褸、絨裙、冷衫同白恤衫，加埋要成五百幾蚊好貴㗎，真頭痛！」
年約三十歲的阿芬，早年與任職旅遊巴司機的阿明共諧連理，婚後在家悉心照顧女兒。豈料丈夫近月有婚外情，拋妻棄女，令阿芬母女彷徨無依。「阿明有婚外情之後，經常發脾氣，而且唔再顧家。」
阿芬訴說，女兒日前感冒不適，亦無錢帶女兒求醫。「個女重細，但都知道佢爸爸唔理屋企，所以曾經對我講：『我要跟媽媽，爸爸咁樣，我冇心機讀書！』」阿芬稱，就讀小一的女兒因父母感情破裂，讀書成績欠佳，現有待社工安排義務功課輔導老師，助她解決學習困難。患情緒抑鬱的阿芬，連月來需接受心理輔導及藥物治療，紓緩壓力及不安情緒。
此外，在社工協助下，阿芬正辦理離婚手續，並已向社會福利署申請綜援，但等候當局批核需時。阿芬苦着臉說：「呢段日子我靠親戚借錢度日，借咗冇得還，𠵱家已經借無可借。我又冇交兩個月屋租、電費同電話費，怕遲早被截電同迫遷，到時我哋兩母女都唔知點算！」由於經濟緊絀，面臨三餐不繼，阿芬與女兒須節衣縮食，目前每日僅以粥麵果腹。
蘋果日報慈善基金了解阿芬母女的苦況後，即時撥款八千元，助阿芬清還拖欠的租金、電費，替女兒購買冬季校服，以及應付短暫生活。
捐款編號：C0718
暖流熱線
電話：29908688
傳真：23702192
電郵：
網址：