若然大家有睇開我哋《車天車地》版的話，昨日應該會睇到今屆即將舉行嘅東京車展，部份未被披露嘅參展新車種，係咪覺得好吸引呢？當中，豐田其中兩款名為WISH同ALSV嘅概念車，定必備受車迷注目，猜測會否係來年量產型新車嘅前瞻外，另一邊廂嘅大發，繼日前（10月15日）響日本舉行全新Move發布會後，相信有唔少車迷都會關心新版Move嘅到港日期。據亞Mark打聽得知，香港代理方面現正積極爭取到港，若然能夠成事的話，佢哋重會引入至Top有全車包圍跟659cc直4Turbo偈嘅AeroDownCustom型號㗎！新款Move線條變得圓潤流暢之餘，一對炯炯有神嘅雙圓大燈組合，加上新改良嘅車廂空間，亦變得闊落又舒適，相信會為車迷所受落。係忠實Fans嘅你就要耐心多等一會，或許會響年底前抵埗都唔定㗎！