港大出新書，當然盡數港大畢業嘅政壇精英，副校長程介明同護法徐詠璇講得坦白，話港大成立之初，未必有為香港培育人才嘅使命感，不過時勢造英雄，現時政界多數係六、七十年代畢業嘅港大人，立法會兩大黨魁李柱銘同死對頭曾鈺成都係港大出品。
曾鈺成更係程介明同孫公嘅同系師弟，程介明話同佢一齊上堂，已經覺得呢位小師弟絕非池中物，分析能力極高，曾主席果然以數學系一級榮譽畢業。
可惜六七暴動改變咗曾鈺成成為丘成桐級數學大師嘅命運，佢細佬及妹妹被捕入獄，自己亦義無反顧去咗左派學校培僑教書。
程介明再遇阿曾，已經係多年後一齊修讀教育文憑嘅時候，導師收到曾鈺成嘅第一份功課，亦即時嚇親，覺得佢夠晒料去史丹福讀博士。不過，阿曾當然冇去到，後來重走上從政嘅「不歸路」。
傳真︰2623-9278
電郵︰