前日小初去文華飲下午茶，撞見經紀黃個大陸客，佢問小初隻松日控股（283）有冇得諗？早前佢以每股25仙買入唔少貨。
松日原本叫英皇科技，今年年中，有個大陸大孖沙，用咗差唔多成億銀買呢隻殼，重將公司改名做松日控股。隻股噚日升12.7％，收31仙，但成交金額只得六十零萬銀，其實只係乾升。最近松日先舊後新配股，以每股20仙，發行近16.66%新股，集資2356萬元，用作發展通訊相關業務。
經紀黃個大陸客話，新大股東用咁多錢買隻殼，冇理由唔做嘢，況且呢隻股向來街貨唔多，要炒作應該唔難。
不過，小初對呢隻股有多少戒心，話就話新大股東用好多錢買隻殼番嚟，但唔好忘記，借錢畀新大股東買殼係舊大股東，連今次配股亦係由舊大股東旗下嘅證券行包辦。由於雙方關係實在太過密切，舊大股東好似垂簾聽政，而佢嘅作風如何，大家都耳熟能詳，所以連膽生毛如小初之流，都唔敢亂掂。
慕容小初