八方去過唔少公司股東會，同唔少公司主席傾過偈，但噚日嘅百利保股東會都算「經典」，令人印象深刻。首先整個會有如「馬拉松」，上午十一點開始，點票點到下午約三點至有結果。可見公司出高價買大股東資產，係幾咁大爭議。
其次，八方喺下午三時多見到主角、受財困多年的世城系主席羅旭瑞現身。金融風暴後，羅氏背負百億債務，不斷變賣上市公司資產還債，現時王國規模已今非昔比，難怪一臉憔悴的羅旭瑞對住八方不斷強調：「經過多年刻苦面對咁多問題，若可以最後解決，總算可舒一口氣……早年公司都冇咁大規模，八幾年時我都係咁做上嚟，所以應面對困難，盡最大努力……」
不過，佢老人家努力重組公司債務之餘，世城系小股東亦賠上老本，除了由於股價大跌，投資蒸發一大截，羅旭瑞喺公司重組大計最後一步，仍將自己的私人公司以高價注入百利保，難怪在場股東都憤憤不平，有被「出賣」的感覺。
（圖中）金融風暴後，羅旭瑞現時王國規模已今非昔比。
傳真︰2623-9278
電郵︰