最近重看八四年的經典美片Footloose，撇開齣戲的精神唔講（"Footloose"是自由自在、不受束縛的意思，），純粹以娛樂而言，此片是上佳之選，靚仔靚女，靚歌熱舞，多可愛青春。
中文片名譯得真好，《渾身是勁》，就連被蚊叮且發緊燒、懷疑患了登革熱病的我，隨男主角KevinBacon教其死黨跳舞的那一段戲，亦動起來跟住畫面郁身郁勢，拗咗幾次柴。十八年前的製作到今日還觸動如此，電影真是forever。
電影也是painkiller，至少在《渾》片播放的107分鐘期間，我個幾兩個月無電影工開呢件閉翳事，丁丁都無上過腦。
《渾》片帶起我對卡式錄音帶的懷念，就把家中僅餘存貨摷出來播放一番，可惜統統都走晒音咯。聽卡式錄音帶的年代，錄「冧」歌送畀心儀男仔，乃示愛手作仔排行榜榜首（第二位是摺幸運星），而時至今日，燒碟已取代之（我也再沒錄歌「冧」誰，其他手作仔已取代之）。
好幸運有樂樂呢位朋友，他一向負責替圍內的一眾人燒新歌，我們之所以對Twins、Cookies和3T認識，幾十歲重可以扮kid，緊貼潮流，就全靠樂樂。
（編按：吳靄儀外遊，暫停一天。）
容雅慧