有時，車迷同歌迷一樣，每當碰到自己心儀嘅車款或偶像嗰陣，內心都會感到有一種莫名嘅興奮；不過，可能會隨住時間流逝而改變。但今日《用車報告》嘅主角Jimmy，對MiniCooper嗰份感情卻可謂有增無減，兒時在澳門賽道上見到MiniCooper作賽嘅片段仍歷歷在目，及後揀選座駕時亦以此為「主要目標」；究竟呢位MiniCooper嘅忠實Fans，對自己部新一代型號有何評價呢？大家不妨一齊嚟睇睇。
記者：鄭達基攝影：黃子偉
協力：Eric
若要數歷年世界車壇嘅經典車款，相信一定會唔會少咗MiniCooper一份兒，事關自1959年推出以來，憑住佢嗰個既Classic又嬌小嘅造型，以及響賽道上嘅雄姿，而令不少車迷對其留有深刻印象，甚至成為佢嘅忠實Fans㖭；及後，MiniCooper被寶馬收歸旗下，廠方便致力研製新一代型號，以求將MiniCooper嗰份獨特個性延續落去；香港代理更於去年初，率先運來一部Demo車抵港作首展，當時曾惹來不少MiniFans去睇車同訂車，其後推出嘅MiniCooperS型號亦有類似情況，而不少車迷亦唔介意要等候多時才有車到手，睇嚟呢部小車真係魅力沒法擋噃！
原有MiniCooper嗰個極具ClassicFeel嘅造型，曾觸動萬千車迷嘅心靈；而喺世界各地賽道上作賽嘅雄姿，更教人記憶猶新，亦因為呢個緣故，而令Jimmy成為Mini嘅忠實Fans。「重記得細細個嗰陣，我已經俾MiniCooper好有ClassicFeel嘅造型深深咁吸引住，直到𠵱家都無變過；而當年佢哋喺澳門賽道上作賽時嘅雄姿，我重記得好清楚。」Jimmy興奮地說。「至於點解我會揀新MiniCooper做座駕，而唔揀類似嘅福士NewBeetle？原因除咗係自己本身同Mini嗰份情意結之外，新一代型號仍留有原車神髓嘅賣相，更係令我心動之處，所以喺去年初預展時便落訂，並以街上少見嘅黃黑兩色作配襯，貪佢夠Sharp夠獨特嘛！」
「雖然我都覺得，NewBeetle嘅乘坐舒適度係較新Mini為高，但後者就勝在設備齊全兼易用，除咗冷氣夠凍之外，套音響嘅音色都唔差㗎！」至於操控方面，Jimmy亦給予新一代MiniCooper有頗高評價，雖然懸掛屬跑車化設定，行車時後座乘客或會感到有些許「彈跳感」，但響16吋輪胎及穩紮車架輔助下，彎路循迹性高之餘重好有路面感，就算大風時行經東區走廊等高速公路，都依然好穩定㗎。
Jimmy雖然對座駕讚多過彈，但佢認為車內嘅倒後鏡面積細小，倒後泊車時會有盲點出現；另外，耗油量亦係一個問題，「可能部車用上一台1.6公升引擎，動力輸出雖足夠但可惜車身較重，因此除咗令起步反應較弱之外，耗油量亦都來得較高。」
MiniCooper呢股魅力，不但迷倒萬千車迷之外，就連娛樂圈一班明星都「愛上迷你」；相信最為人所知嘅，就係陳奕迅同徐濠縈嗰部新款MiniCooper，而謝霆鋒亦曾為座上客，另外當然唔少得重有張栢芝嘅粉紅色舊款Mini啦！