梁漢文（梁炳）前排經濟拮据，佢架波子因為欠供款，要俾人拖走。後來，梁炳老友許志安借咗五十萬畀佢度難關，好在唔使四個月梁炳就搞掂晒嗰身債。
不過，呢排梁炳工作量唔多，相信收入都麻麻。其實咁都好嘅，有多啲時間陪模特兒女友林文慧（Karen），佢哋拍咗拖都成五年，感情好穩定。
日前，梁炳就揸住架波子同Karen喺跑馬地拍拖撐枱腳，梁炳泊好架車之後，就同Karen入咗蓮園食飯，佢哋叫咗個油鴨煲仔飯套餐，有湯、煲仔飯、菜同凍飲，埋單都只係百零蚊，非常經濟。𠵱家咁嘅時世，都係慳啲使好，最難得嘅係梁炳同Karen拍咗拖咁耐都好恩愛，出入都拖住手仔，真係叫人羨慕。
羅文大前晚因為血糖同血壓過低、呼吸困難而送咗入瑪麗醫院搶救，羅文助手阿東噚日離開醫院話：「佢（羅文）成日瞓，又成日醒，𠵱家休息緊，精神都幾好，唔係外邊講得咁差，係瘦啲啫！」問佢羅文係咪得六十磅？阿東話：「黐線！一個男人點可能只得六十磅。」至於，羅文送院嗰晚阿東遮住羅文個樣，唔畀記者影相，佢話：「我梗係要護住老闆，唔畀你哋影到佢個樣啦！」
梅小惠爸爸前幾日過身，噚日佢家人喺九龍殯儀館設靈。梅小惠同梅小青一早到場打點，神情哀傷。梅小惠嘅前男友曾偉權亦都有嚟致祭，不過佢冇同小惠交談，佢哋只係點頭打招呼，反而曾偉權向梅小青慰問。
曾偉權話：「我以前同小惠一齊咁耐，我同世伯好熟，好似自己家人咁。」問曾偉權有冇慰問小惠？佢話：「冇刻意傾偈。」
楊婉儀同前練馬師王登平個仔王瑞勳拍拖幾個月，每日都過得甜蜜蜜，即使係落雨都冇影響佢哋拍拖嘅心情。
馮仁昭日前見到楊婉儀同王瑞勳着黑色情侶裝喺跑馬地出現，雖然嗰時係凌晨重落住毛毛雨，不過佢哋仍然攬到實，邊行邊談心，喺雨中漫步，好鬼浪漫咁，佢哋咁鬼恩愛，睇嚟好事將近啦！
蕭正楠師弟、新晉歌手陳驊（Kenn）日前喺屯門為新歌《莫札特的煩惱》拍攝MV，為咗配合首新歌，唱片公司重請嚟名模Denise為阿Kenn瞓身演出。Denise同阿Kenn大跳辣身舞。不過，對於舞蹈員出身嘅阿Kenn，當然駕輕就熟。雖然今次女角着得性感，但係阿Kenn都冇因為咁而分心。