藝人謝霆鋒案全城哄動，可見一般人對明星動向甚為關注同好奇。中原地產加州分行經理龍智峰對蘭西講，藝人徐錦江喺元朗嘅加州花園單位，啱啱以月租萬八全包租出。另一藝人蕭正楠又喺呢度搵緊樓，已經有心水之選。
聽講蕭正楠已經睇咗一個禮拜，睇過幾間加州豪園屋仔，雖然未有乜嘢表示，但係就話對大單位感興趣，重話加州豪園交通方便，返內地同去機場都好快，所以諗住買嚟自住。加州豪園間隔比加州花園好啲，佢果然識貨！
其實加州花園同加州豪園都有唔少藝人居住，例如葉童、萬綺雯。
講開加州花園，龍智峰話一般放租單位都冇乜裝修，所以叫價全包月租萬五蚊。
有裝修嘅，𠵱家就只得兩個，業主態度較為強硬。就算叫價萬八蚊，可以減嘅空間唔係咁多。所以徐錦江個單位用萬八蚊租咗，實際係市價。
近年一手樓主導市場，所以每逢有大盤開賣，代理行會傾巢而出去拉客，所以售樓現場閒閒哋有逾千代理駐場，有可能維持成個月咁耐，搞到個場好熱鬧。
不過，形勢可能有變，蘭西聽講，地產代理行計劃削減做一手盤嘅人手，唔會再好似以前派咁多人駐場。因為就算派出大量人手，最後做到嘅生意都係有數得計，但係一手代理嘅拆佣，比二手高好多，公司重要照顧埋佢哋嘅飲食同裝備，計落成本好重。睇嚟，遲吓一手代理唔止要降低拆佣比例，可能重要減福利，甚至要cut人㖭。代理行開始汰弱留強，即係話老闆要慳得就慳。
蘭西突然收到「紅色炸彈」，喜宴喺英式私家大花園舉行。英式花園中式喜宴？原來辦喜事嘅係永泰亞洲九龍塘陶源。信封、請柬設計同樣精美，一對龍鳳，兩個喜字，三時恭候，已點出主題。
請柬開啟方式如聖旨，內文謹訂農曆壬午年九月十二日……為陶源英式私家大花園舉行喜宴，恭候光臨，李簡鳳玲敬約，就完全係中式。
正如陶源單位設計仿英式獨立屋，兩個頂層複式取名西方文學家「莎士比亞」及名畫「蒙羅麗莎」，卻選擇了世外桃源的諧音作為樓盤名稱。𠵱家做發展商真係難，連發邀請信都要絞盡腦汁，下次唔知又出邊招。
太古地產港島東區嘅太古坊，設有私人會所，蘭西都去過，個會所都幾大，有健身室同餐廳等設施。會所名係Butterfield's，究竟有乜含意，謎底最近終於解開。
太古集團持有嘅山頂道18號，啱啱搵代理標售，蘭西查過土地註冊處，第一手業主係Butterfield&Swire（HK），打探之下，先知太古集團創辦人JohnSwire，喺1866年同RichardJ.Butterfield在上海結盟，成立Butterfield&Swire公司，即太古集團舊稱。Butterfield喺十幾年後就退股，太古直到1974年先改名為JohnSwireandSons（H.K.）Limited。太古方面話，太古坊個會所名就係咁嚟嘅，太古都算長情。
由中原過檔利嘉閣出任董事嘅廖偉強，近排認真忙，噚日出席利記營業員月會，面對成千個營業員，當然有「新人事新作風」！
Willy（廖之洋名）帶領所有員工高呼口號，主管嘅係「以身作則，大公無私，上傳下達，上下和睦」，營業員就係「我唔做耆英要做精英，我唔做初哥要做一哥」，認真有意思同有鼓勵作用。不過，唔知係咪個會太早開，好多員工喺度「釣魚」。
Willy入行16年，從未請過病假同遲到過，實在係以身作則好榜樣。
內地樓市又再升溫，發展商紛紛有搞作，近期前往內地採訪嘅邀請又多咗。今個月淨係去上海嘅睇樓團就有兩個，另外又有去瀋陽同大連。下個月又再有團去上海。採訪邀請，其實係樓市嘅溫度計，愈多邀請，代表個市愈旺，發展商才肯揼本。
蘭西
電郵地址：