自從峇里島發生大爆炸之後，好多人都話亞洲地區就冇靚島可以歎世界，其實，距印尼冇幾遠嘅泰國，就有個大象島（KohChang），雖然佢係泰國嘅第二大島，但上網搵唔到，旅遊局度又冇資料，可能因為當地人迹罕至、遊客又少啦！酒店冇電話之餘，夜晚又冇街去；不過，如果你係崇尚自然一族，鍾意反璞歸真就最啱喇，因為你可以親身感受到當地無添加嘅陽光與海灘。
記者：余敏
攝影：陳智良
一直認為，世外桃源總該有愛情故事，今次大象島之旅，我倒沒有邂逅俊男，反而是碰上兩個為情而來的鬼佬。
擁着他那上海美女的法國人Yann，專程嚟拍拖。他說10年前已經愛上大象島，話係貪呢度夠寧靜、夠乾淨，「我同女友經常都嚟拍拖，我哋都咁鍾意大自然，喺呢度無拘無束，感覺特別親密。你睇布吉，人又多酒店又多，你去咗都唔覺自己係放假。只係怕日後連呢度都發展埋，就失去原始味道。」這裏真的是桃源？
登上往大象島的船，就像時光倒流，回到油蔴地汽車渡輪年代，船的下層載車、上層載人。重型貨Van、私家車、綿羊仔樣樣齊，車上可謂風光無限，好多泰民都係一家大細加埋寵物狗，出城入貨返來。我同一間Resort的老闆娘阿Mam傾咗幾句，佢話出城主要都係買汽水啤酒、買菜買魚，嘩，聽落呢個島似乎真係乜都冇，要個個禮拜出城辦貨先有米落鍋。導遊突然指着海面說：「看！像不像沒入水中的大象？」是嗎？我唯唯諾諾，心情不禁忐忑。
踏足大象島，竟然是一下子豁然開朗。沿岸的沙灘可以畀你盡情剝清光享受日光，重就可以參加離島行程。我們選定了LaoyaIsland。沒多久，眼前出現一個僅得純白、碧綠、湛藍三色的長灘，真係一個人都無。赤腳步上軟綿綿的沙灘，沒有沖上岸的人為垃圾，還可以拾到完好的貝殼和珊瑚枝。不過導遊也急急上來制止，說這裏屬泰國的國家海洋公園（MarineNationalPark），附近75%海域受法律保護，來自海裏的東西全部不能帶走。經他一提才驚覺，這裏沒有布吉的水上電單車、水上降傘甚至海底漫步之類，唯一合法的活動僅僅是潛水。
既然甚麼都不行，惟有叠埋心水，拿條呼吸管，學做一條「魚」。Laoya島屬大象島附近一個細小離島，海底能見度高，珊瑚礁繁茂，不知名的游魚五顏六色，在身畔悠然擦過。偶爾還會有魚群湧過來，將你簇擁其中，叫人驚愕得忘卻口含呼吸管，想在水中尖叫。
岸上的人沒有機動玩意，也懂得自娛。堆沙、拾貝、鞦韆、排球，各自各精采。客人多是本地識途老馬，通常會買2日１夜套餐來這裏的Resort過一晚。而泰國當地的麗星遊輪更長包了Resort內的幾間套房，供客人游水後沖身，果然好豪。
LaoyaResort 2日1夜套餐
收費：2,000泰銖（約360港元），包三餐及渡輪接駁
地址：87/4ViwattanaRoad,Wangkrajae,AMuang,Trat23000,Thailand
電話：（039）512878
回航返大象島，船家為我們準備了剛撈獲的鮮蝦，蘸上泰式的酸辣醬，鮮甜無比，個個吃得狼吞虎咽，忘了儀態。不過這頓午後小點及不上晚上的精采，大象島上一家名為Chai-Chat的餐廳，很有特色地將部份雅座變身Bangalow，等客人坐在水中央品嘗海上珍饈。泰菜香港都食得多，不過大家讚不絕口的，是一道不知名泰菜，口感像冬蔭功湯混上魚肉攪成，入口如慕絲，大家也就為它起名──魚肉慕絲。
晚上回到SeaViewResort，歐洲式的小屋加上浴室裏一具企腳的浴缸，好有氣氛。不過酒店先旨聲明，房間不設電話，酒店也沒有Fax，完全擺脫城市生活！
酒店：SeaViewResort
房價：兩人標準小屋每晚2,000泰銖（約360港元）
地址：10/2Moo4KohChang,Trat,Thailand23120
電話：018307529
這裏有另一個為情而來的男人，他卻是情場失意。來自夏威夷的Chris一殼眼淚咁話，在網上識咗個新加坡女子，相約在曼谷見面，點知第一晚就被人嫌棄酒店唔夠貴格，迫佢換酒店，佢火鬼滾飛起個女子，問TravelAgency有邊度可以去，人哋畀咗大象島的明信片佢睇，佢覺得好正，於是買咗約4,000泰銖的六日五夜套餐來散心。說到底，追求愛情的行動，依然繼續，在這桃源……
出門提一提
簽證： 持特區護照及BNO均毋須簽證，CI簽證需時1個工作天，查詢：25216481（泰國領事館）。
旅行團： 匡域旅遊尖竹汶府、大象島、芭堤雅5天豪華團，10月底、11月出發團費$2,388，查詢：27762774。
交通： 從曼谷乘車4小時抵渡輪碼頭，轉乘約45分鐘船抵大象島。渡輪視乎搭客多少釐定班次，人多則每小時一班，人少兩小時一班，每位來回船票60泰銖(約11港元)。
貨幣： 1港元約兌5.55泰銖(Baht)
網頁：